Sos giornales de oe #018

Intre sos fatos de crònaca de custas dies, sos giornales presentant unas cantas noas boghende a campu (e non diat èssere sa prima borta) un’idea de Sardigna chi no est a tretu de acumprire a unas cantas punnas.

Comintzemus cun su turismu massissu. «Dae la Pelosa a Punta Molentis, dae Tuerredda a Baunei. Sos sìndigos ponende remèdiu contra a sa carcatripa foras de mesura in sas prus prajas galanas de s’ìsula cunfirmant su nùmeru serradu». Est cosa chi iscrient sos de L’Unione Sarda. Beru est chi a bias diat èssere prus dèghidu a mutire su fenòmenu comente meru e sìncheru càrrigu antròpicu. Su comintzu de s’artìculu a pàgina duas diat pòdere cunfirmare custu sèberu terminològicu eventuale. «Chimbemìgia carenas assoliende·si in 500 metros de arena, cada die e pro totu s’istiu. Galu pro meda podiat bajulare totu custu s’ecosistema dìligu de sa praja de sa Pelosa?». Pro custu s’optzione est sa de su nùmeru limitadu: 1500 francu sos minores e sos chi bi traballant. E su problema no est istiale ebbia. S’esèmpiu est Mamujada cun su sìndigu chi «su mese de santandria coladu, in ocasione de sas tres dies de Autunno in Barbagia at dèvidu iscrìere in sos social “Gràtzias pro s’istima, ma semus a su lìmite de sa càbida”» pro more de «30, 40mìgia persones» in una «comunidade minore de 2.400 abitantes». Inoghe – si narat e lu leghimus - sa solutzione diat pàrrere sa de organizare prus eventos in intro de s’annu (e comente? "numero chiuso" e turnos? ndr) Gosi serrat s’artìculu: «Sos sìndigos, però, non cherent lassados solos, bi cheret un’organizatzione subracomunale chi cuncurrat a sa resèssida bona de sas atividades; e bi cheret fintzas s’agiudu de sa Regione, mescamente in contu de promotzione».

Su contu de unu sìndigu lassadu solu, finas a s’interessamentu de s’Anci, est su chi agatamus in La Nuova Sardegna. Semus faeddende de su primu tzitadinu de Martis. «Burocratzia contrària e antìtzipos. In perìgulu sos progetos de su Pnrr». Ca b’at chertu sete meses pro resèssere a nche marcare su Comune in su ReGis, sa prataforma eletrònica pro sos progetos de su Pianu natzionale de ripresa e de resilièntzia, «s’ùnica manera pro antitzipare sos gastos e torrare a àere sas summas antitzipadas». In custu casu «150mìgia èuros prelevados dae sas càscias comunale pro unu progetu de efitzientamentu energèticu». Lompende a concruos de artìculu leghimus chi «sos prus Comunes minores, cun sos bilàntzios prus làngios, non ant possibilidade de pòdere antitzipare summas maduras e b’at perìgulu chi custu lìmite li paret su pee a unos cantos progetos de su Pnrr chi, pro custu, o si lassant in caminu o abarrant in su pabiru ebbia».

Dende una mirada a sos giornales italianos sos temas sunt: sa talpa de su Pentàgonu (Corriere della sera); su dietro-front in contu de migrantes («Su guvernu: “de agiudu pro reduire su bèpidu”», La Stampa; «Su guvernu frenat, difìtzile sa lìnia dura», Il Giornale); su divòrtziu Renzi-Calenda («Duos de cupas», Il Manifesto); sas prioridades finantziadas («15 milliardos de èuros pro su ponte e zeru pro cuntratos e pensiones», Il Fatto quotidiano).

A lunis!