Sos giornales de oe #012

«Aèreos, sa birgòngia de Pasca». Deretu gasi tìtulat L’Unione Sarda torrende a abèrrere una chistione chi aìamus lassadu a banda sas dies coladas. «Finas a 750 èuros pro bolare acurtziende·si·nche a su ponte festivu. Creschent sas tarifas màssimas pro sos turistas e impennant sos prejos pro sos passigeris residentes pro neghe de s’inflatzione e de su càrculu de s’Iva. Una novidade chi agravat su billete de 8 èuros».

Su càrculu su giornale lu faghet in segunda pàgina: «Dae sos concruos de martzu sunt in vigore sos prejos noos istabilidos dae su ministeru de sos Trasportos chi, a comintzu de cada istajone aeronàutica, agiornat sos listinos de sos collegamentos in regime de continuidade territoriale. Sas diferèntzias sunt craras e lompent belle a pustis de un’annu de rincaros in cada setore. “Sa variatzione riferida a su tassu de inflatzione”, leghimus in su decretu, “nch’est a unu +8,1% cunforma a su 2021”, cando chi “sa mèdia de sas cuotatziones mensiles de su jet fuel de su segundu semestre est mudada de su +24,24% cunforma a sa mèdia de su primu”».

Ma si in antis sos ufìtzios de su Guvernu ant carculadu sa tarifa includende s’Iva, como custa est a banda. «Duncas sas cumpangias sunt autorizadas a summare a sas tarifas noas fintzas un’àteru 10% de imposta pro su valore agiuntu».

Torrende a sos bolos de Pasca e a sos 750 èuros mentovados in prima pàgina, a sa de tres L’Unione càrculat sos prejos de sas cumpangias, fintzas de Aeroitalia «chi at in pessu firmadu unu “patu de amistade” cun sa Regione pro cuntènnere sas tarifas e riservare sos iscontos finas a sos emigrados» e chi «pedit finas a 589 èuros pro unu bolu andada e torrada in s’asse Milanu-Terranoa».

Torrende a sa segunda pàgina, su giornale imprentat sos faeddos de «sìndigos e assessore» contra a sa fusione de sas sotziedades de gestione de sos aeroportos de S’Alighera e de Terranoa. Su delegadu a sos Trasportos narat chi de custa manera sa Regione contat pagu: «Si s’aeroportu de Terranoa l’ant valutadu 362 milliones e su de S’Alighera 22, cheret nàrrere chi sa parte pùblica, su 30% in Sogeaal, in sa cumpàgine noa nch’at a lòmpere a unu 3% mìseru». Duncas? «Si balet pagu nos lu torramus a pigare nois». Ma est cosa narada in unu de sos bator apuntamentos de sa mobilitatzione generale de su Nord Sardigna. Eventu in ue finas s’amministradore de sa Provìntzia deTàtari Pietro Fois at naradu de bi fàghere intrare sos 92 Comunos comente atzionistas. Eja, mancu in su Vinitaly nde narant cosas gosi.

Mobilitatzione generale? Sa foto est a maduru in sa prima pàgina de La Nuova Sardegna (ca sa noa printzipale pertocat sos telefoneddos in sa presone de Badu ‘e Carros). «Creschet sa boghe de sa “vertèntzia nord-ovest” chi eris at animadu s’aeroportu de sa Costera de su Coraddu pro sa prima de sas bator manifestatziones itinerantes chi nch’ant a lòmpere a Portu Turre (su 17 in Fiumesanto), Otieri (su 20 in s’ospidale) e Patada (su 27 in sa diga de su Lerno)». Ma sa prataforma, in prus de èssere ampra non est nemmancu crara in contu de cajones. A su nessi movende dae sos faeddos de su sìndigu de Portu Turre: «Semus sufrende una situatzione chi non cumprendimus nemmancu chie est responsàbile de ite». Contra a sa Regione, imbetzes, su sìndigu de Tàtari, dae pagu dimìtidu dae presidente de s’àera metropolitana: «Non podides pedire sa cunfiantza de custu territòriu chi no ais ischìpidu ascurtare». Àtera chistiones essidas a campu in cussu addòbiu: sos trenos a idrògenu e sa bator corsias Tàtari-S’Alighera: «Est firma. “Mancat sa firma de Solinas”. Ma su presidente chi no est gasi».

In Itàlia gosi ant imbetzes impaginadu. Corriere, Repubblica, la Stampa, Il Messaggero, Il manifesto, Avvenire e carchi àteru aberint cun su Pnrr e sa capatzidade o mancu de gastare sos soddos de cussu pianu. Sa mègius sìntesi creativa tocat fintzas oe a su manifesto chi iscriet a maduru «Fiasco» cun Meloni a tatza prena in su Vinitaly. E b’at de agiunghere unu “in vino veritas” pro more de sos faeddos de sa presidente de su Consìgiu in contu de agràrios e litzeos. Pro custa chistione s’abertura est de su Fatto quotidiano chi, torrat a impreare su tìtulu de su Giornale de eris («Bratzos furados a sa massaria») ma narende·lu a Meloni e a su su connadu, su ministru Lollobrigida. Leghimus: «Sos ministros promovent s’iscola a su servìtziu de Confindustria. Sa Cgil: “Caporaladu est”». Ah: posca si faeddat de Friuli.

m.p.