Eritzone de mare, sa Regione aumentat sas dies e sas oras de pisca

S’Assessore regionale de s’Agricultura Valeria Satta at mudadu s’artìculu 7 de su decretu suo de su 14 de nadale in contu de eritzone piscadu in mare pro s’istajone 2022/23.

Su decretu originàriu, chi paritzas crìticas aiat regortu dae parte de ambientalistas e de àteras sensibilidades, naraiat chi «est proibida pro su piscadore marìtimu professionale e pro su piscadore subàcueu professionale sa bogada de esemplares de eritzone de mare sas dies de domìniga, lunis e martis». In su decretu annoadu sa proibitzione pertocat petzi «sas dies de domìniga e de lunis».

De prus: si in antis sas oras de atividade fiant sete («dae sas 6.00 finas a sas 13.00»), como ant a èssere 8 («dae sas 6.00 finas a sas 14.00»).

Comente si leghet in sa premissa a su dispositivu (chi alliongiamus inoghe suta), «sos assòtzios regionales de sos piscadores subàcueos professionales de Sardigna, in data 17 de ghennàrgiu, ant presentadu s’esigèntzia de incrementare su nùmeru de sas dies setimanales, permitende sa pisca de s’eritzone de mare finamentas su martis, e de permìtere su prelevamentu e s’isbarcu finas a sas 14.00».

Sa nada e sa fata, ca nat chi s’istajone est comintzada «de facto su 14 de nadale». Pregonta: podiat comintzare in antis de cudda data si est de tando su decretu chi l’aberit?

M.P.

Fotografia leada dae Wikipedia