In Sìligo sa Carta de s’Aspru contra a sas gherras

«Nono a sas gherras. Trunchemus sas armas. Totu cantos paris». Sunt tres de sas paràulas de òrdine de sa Carta de s’Aspru chi, in su logu matessi chi bi naschet sa comunidade Mondo X de Padre Morittu, at a èssere presentada cras, domìniga 15 de ghennàrgiu a sas 10, gràtzias a s'aficu de bator assòtzios làicos e cristianos sardos: s’assòtziu Intrecci culturali, su comitadu #fermiamolaguerra, sos Acli e Laudato sii.

Sos grupos aiant giai promòvidu una manifestatzione patzifista su 2 de nadale de s’annu in pessu coladu. Como sunt invitende a sos eletos in Regione e in Parlamentu pro chi s’espressent non contra a sa a gherra ebbia ma finamentas in contu de «agiudu a sos fraigadores de paghe», de «non violèntzia ativa», de «blocu de su riarmu» e de «stop a s’annestru bèllicu in custa regione de polìgonos, bases e tzerachias».

M.P.