Sustenibilidadi: in sa COP26 ddoi fiat sa Sardigna puru

Terra - Ddoi fiat sa Sardigna puru cun su programma de coperatzioni transfrontaliera “ENI CBC Bacino del Mediterraneo” intre is chi ant pigau parti a sa COP26, est a nai s'atòbiu de importu mannu aprontau de is Natzionis Unias asuba de su clima. Cust'atopu, chi s'est isboddiau in Glasgow de su 31 de ledàminis a su 12 de onniasantu passaus, at auniu is leader de dogna istadu de su mundu po chistionai de ita fai po ndi bessiri de sa crisi climatica.

Ma ita nc'intrat sa Sardigna cun sa COP26? Po arrespùndiri bisòngiat a nai ca su 9 de onniasantu passau sa Sardigna at fatu sa parti cosa sua presentendi duus progetus insertaus pròpiu in su programma “ENI CBC Bacino del Mediterraneo”. Fueddaus de duus progetus sustenìbilis, duncas chi non ferrint a s'ambienti e non funt dannosus po su clima; chistionaus de initziativas chi pertocant a s'eficèntzia energetica in is fàbbricus pùbbricus. Nau aici si cumprendit poita su nòmini de su primu progetu est BEEP, est a nai “Building Information Modeling for Energy Efficiency in the Public Sector”, e su de duus si lamat ESMES, “Energy Smart Mediterranean Schools Network". S'unu e s'àteru funt istètius presentaus de Sorina Mortada, istudiosa de su Tzentru libanesu po s'energia chi est partner siat de su progetu BEEP siat de ESMES.

“Racing to 1.5°: cities implementing evidence-based climate & energy action in Europe & Mediterranean” est su nòmini de s'atòbiu de COP26 chi s'est tentu online de is 18.30 a 19.30 de su 9 de onniasantu e chi at biu sa presentada de custus progetus sardus marcaus ““ENI CBC Bacino del Mediterraneo”. Su momentu est istètiu profetosu meda siat poita ddoi fiant is rapresentantis de sa Commissioni europea, siat poita custa est istètia un'ocasioni po sutalineai ca po fai progetus de importu non serbit a impestai su logu, ma is progetus prus frutosus funt cussus chi curant sa terra e su clima atressu de programmas de rispàrmiu de energia.

Attività realizzata col contributo della Regione Sardegna - IMPRENTAS 2020-2021. LR 22/2018, art. 22