“Life Regs II”: su progetu sustenibili chi previdit su recùperu de su terrinu
Terra - In Uddusò is refudus de sa traballadura de su granitu si mudant in resursas. Est su chi previdit "Life Regs II" (Est a nai “REcycling of Granite Scraps II”), unu progetu chi tenit sa punna de recuperai su terrinu ocupau de is discàrrigas.
"Life Regs II" est ghiau de Carmela Vaccaro, de su dipartimentu de "Scienze dell'ambiente e della prevenzione" de s'Universidadi de Ferrara, e est unu progetu finantziau de sa "Commissione Europea" chi s'insertat aintru de sa caminera promòvia de s'Unioni Europea po lòmpiri a un'aprovistamentu sustenìbili de is mineralis industrialis e de is matèrias primàrgias crìticas.
Mudai in sustenìbilis is refudus de su granitu est cosa de importu mannu po is territòrius de su Monteacuto. Su granitu, difatis, produit una cantidadi de refudus manna meda e est po custa rexoni ca su progetu de circa "Life Regs II" olit pònniri in òpera una tennologia innovativa chi, partendi de is refudus de su granitu, siat capassa de produiri mineralis fondentis po s'industria chi fait istèrgius de terra.
A cali resultaus si olit lòmpiri cun custu progetu? Carmela Vaccaro sutalineat ca sa punna est sa de arribbai "a ndi liai millioni de chilus de refudus de granitu po ponni 10 ètarus de matas. Fadendi diaici s'at a ammenguai meda sa produtzioni de CO2".
No est acabbada innoi. Difatis, comenti eus atzinnau, su progetu "Life Regs II" previdit puru su recùperu de su terrinu ocupau de is discàrrigas. S'obietivu est su de avalorai su parcu archeològicu chi s'agatat acanta a su polu de bogadura. Seus fueddendi de unu tretu caraterizau de giassus nuraghinus e prenuraghinus.
Su protzedimentu non prevedit su consumu de àcua e in prus impreat energia rinnovàbili.
"Life Regs II" est ghiau de unu "partner" industriali, sa realidadi piemontesa Igm ("Internazionale Graniti Masera"), e trisinat sa dita de Terranoa Soro Giorgino Angelo&C, esperta in sa bogadura de rocas de granitu de impreai po bellesa. A sa circa pigat parti po finas s' "Istituto di Geologia ambientale e Geoingegneria" de su Cnr. Faint parti de su progetu su Comunu de Uddusò e s'Assessorau de s'Indùstria de sa Regioni Autònoma de Sardigna.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
