Tàtari: Sa Domo de Totus a su costau de is traballadoris de Trieste

A cumentzai de oi, 15 de su mesi de ledàminis 2021, s'Istadu italianu at èssiri s'ùnicu Paisu in su mundu a acapiai calisisiat profesioni pùblica e privada a s'ammustradura de su green pass, est a nai de unu permissu chi non serbit a donai una tzertificatzioni asuba de sa saludi is traballadoris. Su green pass, difatis, est unu permissu chi, mancai su vatzinu contra a su covid 19 no siat obligatòriu ddu fait parriri obligatòriu. “De custu - sutalineat Sa Domo de totus - ndi tenit prexu mannu Confindustria, est a nai su primu òrganu chi rapresentat is impresas, e po finas su mantessi organu chi in Itàlia at guvernau inderetura sa pandemia”.

Ma comenti at fatu Confindustria a guvernai sa pandemia in s'Istadu italianu? Po Sa Domo de Totus dd'at fatu istabilenti cali fainas depiant abarrai obertas e cali depiant serrai. Su riferimentu est a manera crara a su chi est acòntessiu in su 2020.

Ma “Impari a Confindustria - si ligit in sa nota de sa Domo de totus – si ndi prexant puru is sindacaus cunfederalis e unu nùmeru mannu de organizatzionis de 'manca'”.

In nd'unu clima sèmpiri prus argu e pitzigorosu is no green-pass benint marcaus comenti fascistas. Est in aintru de custa situatzioni chi s'insertat sa protesta ghiada de is traballadoris de su portu de Trieste contra a su green pass. Una protesta chi bit su faori de “Sa Domo de Totus” puru. S'asòtziu, difatis, pedit a sa Regione Autònoma de Sardigna is tamponis a indonu po totus is chi non si olint vatzinai.

No est totu. Sa Domo, difatis, acotzat sa mobilitada de s'iscola po su diritu a s'istudiu e a su traballu. “Seus - si ligit - contra a dògnia forma de su controllu sotziali e contra a dògnia limitatzioni de sa libertadi de manifestai”.