Diferentziada: sa Sardigna lompit a su de duus postus
Terra - Sa Sardigna tenit unu record bellu meda: est lòmpia a su de duus postus in sa classìfica de is regionis italianas chi faint mellus sa boddidura diferentziada.
Est gràtzias a custa classìfica puru chi sa Giunta de sa Regioni Autònoma de Sardigna at pigau su determinu de mandai ainnatis su mecanismu de premialidadi e de penalidadi chi at adotau fintzas a immoi. Custu mecanismu at èssiri postu in òpera fintzas a su 2022. Sa punna est sa de lòmpiri a tenni in s'ìsula s'80 po centu de s'àliga diferentziada intre su mesi de idas de su 2022.
Po Gianni Lampis, Assessori de sa Defensa de s'Ambienti, su de sa premialidadi e penalidadi est un'istrumentu de importu mannu, chi s'est dimustrau eficatzi meda. Difatis, si castiaus a is nùmerus de sa boddidura diferentziada in su 2002 – candu custa fut a su de su 2,8 po centu - e ddus cumparaus cun is nùmerus de su 2019 - annu chi presentat una boddidura diferentziada a su 72,9 po centu - si nd'agataus de is passus mannus fatus in Sardigna.
Cun custus nùmerus, duncas, a s'ìsula ddi meressit su de duus postus. In Sardigna, acrarat s'assessori Lampis, funt 363 is Comunus chi po sa boddidura diferentziada ant superau s'obietivu de su 65 po centu previdiu de sa lei; 118 Comunu ant superau s'80 po centu e unu Comunu feti, su de Orosei, at superau su 90 po centu. Sa punna de sa RAS est sa de lòmpiri a su 2022 cun s'80 po centu de sa boddidura diferentziada in su prus de is Comunus.
De dògnia manera oindì s'agataus a faci de un'acabbu de dinai po sa premialidadi/penalidadi sèmpiri prus mannu. Po assupriri a s'acabbu de custu dinai, funt istètius assignaus 2 millionis de èurus a is impiantus de elimintazioni chi s'agantant in su territòriu sardu. Custu dinai, chi fait parti de su bilàntziu regionali de su 2021, at a permitiri de mantènniri su mecanismu postu in òpera de is annus passaus fintzas a oi. A gosai de custu dinai ant èssiri: su Cunsòrtziu industriali provintziali de Bidda de Cidru, su Cunsòrtziu industriali provintziali Aristanesu e su Cunsòrtziu po sa zona industriali de Macumere. Est una chistioni de importu chi pertocat a s'ambienti e, duncas, a nosu etotu.
Attività realizzata col contributo della Regione Sardegna - IMPRENTAS 2020-2021. LR 22/2018, art. 22
