Prima essida in Rai3 de Beni cun me, trasmissione ideada e ghiada dae Adrià Martín in manera esclusiva in is lìnguas de Sardigna

Arriceus e pubblicaus cun praxeri.

Adrià Martín est professore de s’Universidade Autònoma de Bartzellona e collaboradore de s’Universidade de Casteddu, e dae su 3 ghennàrgiu 2021 est puru presentadore de una trasmissione RAI: Adrià - Beni cun me, unu programma subra is lìnguas de Sardigna.

Registradu in s’istade de su 2019, Adrià Martín at giradu s’ìsula in furgone, in chirca de persones e eventos acapiados a is lìnguas autòctonas: aligheresu, gadduresu, sardu, tabarchinu e turritanu. In sa trasmissione ddoe est puru su musitzista aligheresu Claudio Gabriel Sanna e s’arrepadori de Casteddu Dr. Drer, cun chie Adrià at a cumpartzire unu cuntzertu in su Poetu.

Sa trasmissione est istada ideada dae su cumintzu comente un’iscàmbiu multilìngue cun s’iscopu de contribuire a sa visibilidade de is lìnguas sardas, totus cunsideradas in perìgulu de estintzione dae s’Unesco.

A su livellu universitàriu, Adrià Martín si òcupat de tecnologias pro sa tradutzione, e at collaboradu a sa nàschida de su primu tradutore automàticu pro su sardu. Est puru fundadore de Sardware, assòtziu chi traballat pro sa presèntzia de su sardu in sa tecnologia. Comente musitzista, at publicadu calicuna die a oe — cun su nòmine artìsticu Adrià Mor (www.adriamusic.cat)— su primu CD a sa sola, Lo somrís de la magrana (‘su sorrisu de s’arenada’), formadu dae cantzones chi issu etotu at iscritu comente colunna sonora pro sa trasmissione.

Trailer: https://www.facebook.com/webtvdesaslimbasdesardigna/videos/231723468463924/ Canale de Telegram: t.me/s/adriamartin/54