Sos binos de sas “Tenute Gebelias di Loddo Nicola” contant sa Sardigna prus antiga

* Dae sa terra a sa butìllia * - Binos bonos meda chi sunt costoidos intro ampuddas cun etichetas galanas e pretziosas. Semus faeddende de sas bèvidas produidas dae sas “Tenute Gebelias di Loddo Nicola”. Una realidade interessante chi s'agatat in Lanusè e chi sighit su caminu suo dae unu sèculu pagu prus o mancu.

S'azienda de Nicola Loddo est nàschida in sos primos annos de su Noighentos e in totu sa vida sua at traballadu cun costàntzia e passione. In su 2018 custa cantina at otentu unu reconnoschimentu importante in su “Sardinia Food Award”, un'atestatzione de balore pro su caminu fatu finas a oe.

"Gebelias" no est feti su nùmene de su marcu chi inditat custa cantina. Est finas su nùmene de sa localidade in ue s'agatant sas bides pastinadas dae Loddo. Custu sartu est in territòriu de Barì, sas terras suas s'agatant in una campeda a 250 metros a subra dae su mare e godint de sos bentos chi arribant dae cue. Custu est un'elementu importante pro ite ca sos bentos donant caraterìsticas ùnicas a sos binos Gebelias.

Sa cantina de Nicola Loddo presentat duas propostas: sa “Linea Gebel” e sa “Linea Battaglie”. In sa primu agatamus unu binu e una grapa. Su binu est unu nieddu “Isola de Nuraghi IGT”, unu blend fatu cun àghina Cannonau, Carignanu, Cabernet e Sangiovese; una bèvida nuscosa chi at 14 grados de alcol e chi pasat in carradas de orròele pro 12 meses. Finas su nùmene Gebel est interessante meda, pro ite naschet dae sa paràula “Gebel”, chi in limba àraba est impreada cun su significadu de “monte”. Tando su monte est sa campeda in ue si coltivant sas bides de sas “Tenute Gebelias”, unu sartu chi pro sèculos e sèculos at costoidu repertos archeològicos importantes. Intre custos ddoe at còngios e cuntenidores chi forsis s'impreaiant pro su cummèrtziu de su binu in su Mediterràneu.

Sa “Linea Battaglie” presentat tres binos de primore: sunt unu nieddu, unu biancu e unu rosadu. Su nieddu est su “Karam”, unu “Cannonau di Sardegna D.O.C.” chi est friscu e echilibradu e chi acumpàngiat bene màndigos de petza arrustu, tzupas e casu. Su biancu est s'“Amistral”. Su nùmene suo est àrabu e est sa paràula chi inditat su Bentuestu. Custa bèvida est unu “Vermentino di Sardegna D.O.C.”, at 13 grados de alcol e est bona a la bufare cun pische, casu friscu e birdura. Su rosadu est su “Riek”, una bèvida fata cun àghina Cannonau chentu pro chentu produida feti cun budrones ischertados.

Sas tres ampuddas de “Battaglie” ant su nùmene de tres batallas importantes, batallas antigas chi sunt finas rapresentadas in sas etichetas de sos binos e chi ligant a strintu s'istòria de custa realidade produtiva cun s'istòria de totu sa Sardigna.