Vacàntzias in bitzicleta in sa terra de su Chianti

(IlMinuto) - Casteddu, su 10 de argiolas - Dae Fiesole a Impruneta e a Scandicci colende in noe caminos diversos. Est sa vacàntzia tziclo-turìstica e enogastronòmica pro is giòvanos istimadores de is duas rodas. Sunt in cue is 27 aziendas agrìcolas de su Cunsòrtziu de Tutela "Chianti Colli Fiorentini", unu territòriu ricu de istòria, cultura e traditziones gastronòmicas, in ue ais a agatare un'itineràriu turìsticu pro girare in bitzicleta in mesu a crèsias, museos, agriturismos, bìngias e cantinas.

Est sa proposta de su Parcu tziclo-turìsticu Colli Fiorentini, chi rugrat is cussòrgias a sud de Firenze in mesu a montigros e bìngias, colende in 18 comunos (Firenze, Lastra a Signa, Scandicci, Impruneta, Bagno a Ripoli, Rignano sull'Arno, Figline Valdarno, San Casciano Val di Pesa, Tavarnelle Val di Pesa, Barberino Val d'Elsa, Certaldo, Montespertoli, Montelupo Fiorentino, Pontassieve, Reggello, Fiesole, Pelago e Incisa ) e in totu is aziendas chi produent cussu binu famadu. S'itineràriu, chi comintzat e finit in sa tzitade prus manna de sa Toscana, est partzidu in noe caminos chi ant una longària e una dificultade altimètrica diversa unu dae s'àteru, in modu chi fintzas is tziclistas chi non sunt allenados meda podant connòschere sa bellesa de cussa zona in subra de una bitzicleta.

Tra is biddas chi ais a agatare in custu caminu bolimus ammentare Fiesole, chi at unu museu archeològicu de importu e unu tretu longu de is muros de su de III sèculos in antis de Cristos, su teatru romanu mannu e sa catedrale de su comintzu de su sèculu XI, chi at unu campanile de su '200 artu prus de 40 metros.

A curtzu a custa bidda bi sunt is domos antigas de is segnores toscanos e sa prus de importu est sa Villa Medici, chi nche l'at fata fraigare Cosimo de' Medici in su 1458. Colende a s'àtera ala de su riu Arno podeis bìdere San Pietro, sa prima de is crèsias romànicas de su territòriu de Bagno a Ripoli, in ue bi sunt fintzas is crèsias de San Donnino a Villamagna e de Santa Maria dell'Antella.

Cherent bidos fintzas is casteddos de Belforte, Monte Acuto e Quarate e is villas chi fiant de sa famìlia Medici in Lappeggi e in Mondeggi. In is cùcuros a curtzu a Scandicci b'est sa crèsia de San Martino alla Palma e paritzas villas antigas e ricas che a sa de is Collazzi. Su cumbentu cluniacense de San Salvatore in Settimo est de s'annu 1004, e est unu de is edifìtzios religiosos prus de importu de sa Toscana.

In su territòriu de Tavarnelle, in Val di Pesa, b'est su burgu medievale de San Donato in Poggio, chi costoit galu unu tretu mannu de is muros antigos, palatzos de su 200 e de su 300, su palatzu Malaspina chi est de su Rinaschimentu, sa crèsia gòtica de Santa Maria della Neve (sèculu XV) e sa crèsia romànica de San Donato.

Carta de identidade de su logu