Unu biàgiu a Graz, in ue totu est un'incantu

(IlMinuto) - Casteddu, su 10 de maju - Graz, una tzitade cosmopolita e a sa moda, inghiriada dae su birde de sos parcos, su nuscu de sos frores, cun sas coberturas rujas e su riu Mur chi partzit sa tzitade betza dae sa zona de s'Hauptbahnof, est sa capitale de una regione incantada, sa Stìria.
Capitale europea de sa cultura in su 2003, a pustis de Vienna est sa segunda tzitade de s'Austria, e mèritat de andare a la bìdere: su tzentru istòricu suo nche l'at decraradu Patrimòniu culturale de s'umanidade s'UNESCO e testimòniat sa grande istòria de sa tzitade in ue si sunt adobiadas sas culturas germànicas, balcànicas e mediterràneas.

Sas carreras de Graz sunt prenas de arte e de cultura, e sos cafè literàrios si prenent de giòvanos universitàrios e de intelletuales. Sas Universidades de Graz sunt ses e oe est sa tzitade a ue andant prus istudiantes istràngios cun su programma Erasmus.

In sa capitale de sa Stìria non mancant sos teatros e sa bida culturale non dormit. Difatis in Graz b'at paritzos fèstival de arte e de mùsica. Graz a la bìdere paret meridionale meda, ca at un'àera chieta e alleriada, fintzas si est unu de sos tzentros culturales prus ispibillos de s'Austria. Su "Steirische Herbst" (atòngiu stirianu) est unu fèstival de avanguàrdia, chi ogni annu in su mese de ladàmine faghet andare a Graz unas 45.000 persones. Imbetzes in s'istiu b'est su fèstival musicale "Styriarte", chi lu faghent in su giardinu de su casteddu de Eggenberg.

Graz, est connota fintzas comente capitale europea de sa mùsica jazz. Est una tzitade moderna cun facultades universitàrias iscientìficas de importu.

Ite bìere inoghe? Pro comintzare, s'Uhrturm, sa turre de su 1712 sìmbulu de sa tzitade in su tzentru de Graz (carrera Schlossbergplaz A). S'Uhrturm tenet unu parcu galanu e ricu de frores.

In s'oru destru de su Mur s'agatat sa Kunsthaus de su 2003, sìmbulu de cuntrastu intre betzu e nou. De non pèrdere su Schlossberg (carrera Am Schlossberg 7), purmone birde de Graz. Su Schlossberg est su casteddu in su monte chi s'agat in su tzentru istòricu de sa tzitade. Inoghe si podet artziare a pee fadende 260 iscalinos, o leende sa Schloßbergbahn (sa "funicolare") o su Schloßberglift (s'ascensore).

In sa Herrengasse, su tzentru de Graz, de bìere puru sa Landeszeughaus: chimbe pranos cun 32.000 armas istòricas e ainas de gherra.

In antis de lassare custa tzitade galana pro ghirare a domo, bos cussigiamus unu pràngiu in suta de su carillon, mancari papende una bella kürbiskernschnitzel!

Carta de identidade de su logu