Amsterdam, sa prus istimada dae sos giòvanos

(IlMinuto) - Casteddu, s'8 de maju - Unu biàgiu in Olanda pro sas vacàntzias podet èssere sa risposta giusta a su disìgiu mannu de sos giòvanos de biagiare. Pro custu, nois bos cussigiamus unu biàgiu a Amsterdam.

Amsterdam est una tzitade fata pro èssere ammirada camina camina o in bitzicleta, in ue però su servìtziu pùblicu est bonu e garantidu a de note puru.

Pro nolegiare una bitzicleta a Amsterdam bos cussigiamus de andare de MacBike. MacBike tenet chimbe sedes in tzentru; sas printzipales: Amsterdam Istatzione tzentrale Est e Leidseplein.

Amsterdam est una tzitade ispantosa, unu tzentru a sa moda! In cue s'architetura, s'arte, sa cultura e sa bida noturna lis agradant meda a sos giòvanos! Difatis, sa bida noturna de Amsterdam est in armonia cun sa tzitade.
Unu biàgiu “clàssicu” pro totu sas istajones, andare a Amsterdam est semper una festa, fintzas ca in cussa tzitade b'at semper carchi cosa de interessante: in generale in totu sa tzitade b'est semper sa freba de s'ispàssiu.


Immaginade·bos chi su sero pro ballare si andat a su museu. Pro esèmpiu, cherent provadas sas festas lounge in su museu Van Gogh: ogni chenàbura finas a sas h. 22.00 video e mùsica sonada dae sonadores o dae dj, alligrant sa sala de mesu de su museu e la trasformant in unu locale a sa moda. Ma no est totu in cue, ca cando aperint s'Hermitage, in Amsterdam s'atmosfera artìstica tzitadina sighit a s'ismanniare.



Inoghe sa vida culturale est interessante e sos museos sunt sas atratziones printzipales de sa tzitade. De bìere: su Van Gogh Museum (Hermitage Amsterdam - Amstel 51), su Rijksmuseum (Jan Luijkenstraat 1) e su Stedelijk Museum (Museumplein 10).

Su coro de sa tzitade est pratza Dam. Inoghe s'agatant Koninklijk Paleis e Nieuwe Kerk. E chi bos benit gana de fàghere còmporas non podide pèrdere su Waterlooplein, in ue si podent comporare medas cosas. Waterlooplein est rica puru de cafeterias.

Unu biàgiu a Amsterdam no est unu biàgiu perfetu si finit chene de andare a sa Anne Frank House, in Prinsengracht 267, in su cuartieri Jordaan.

De tastare, in su tzentru de sa tzitade: sos pannekoeken, s'appeltart, sos siropwaffels, sos hagels e sos poffertijes.

Sa tzitade est prena de giòvanos, e duncas non mancant sos logos prus baratos, comente ristorantes a bonu prètziu, ostellos e tzilleris.

Medas bortas, traballeddos de design fatos a arrangiadura daent un'allèriu ùnicu a cada logu.


Si bos bolides regalare unu biàgiu ispantosu, a sa fine de sos contos, sa tzidade de Amsterdam paret pròpiu sa tzitade giusta pro bi colare una vacàntzia in custu istiu! E a tie ite ti paret?

Carta de identidade de su logu