S'istòria de Alessandro unu traballu de operàju e una gherra fitiana po portai a cumprimentu is bisus suus
Image
(In Tempus de crisi) – Casteddu, 9 de su mesi de maju - Classi 1976, Alessandro, terrabesu, agoa de s'essi dipromau in su Lizeu Iscientìficu de Aristanis, moviu de un'amori mannu po is istùdius umanìsticus pigat su determinu de s'iscriri in sa facoltadi de Filosofia de Casteddu. Laureau in su 2005, su piciocu de Terraba s'agatat cun d-unu tìtulu in busciaca e chentza de unu traballu. I est aici chi po subrabìviri at cumentzau a fai s'operàju istasonali, est custu, difatis, de cuatru annus a custa parti s'ùnicu impreu cun cuntratu "normali" chi at agatau agoa de su caminu de istùdius fatu. Fuedda fuedda de su mundu de su trabballu e de is arragus chi ferrint a is laureaus sardus, cun amargura manna afirmat: "Naraus ca su 90 po centu de is personis chi connòsciu si tenint unu cuntratu no traballant in su cumpartu innoia ant istudiau. Duncas ddoi at caluncunu problema". Mancai totu, Alessandro no mollat is passionis suas, e hoindì sendu un'amanti mannu de lìburus, tzìnema e mùsica, fait unu cursu po diventai bibliotecàriu, sighendi a arai unu bisu chi si tragat a pabas de sèmpiri, su de podi traballai in d-una biblioteca. E sighendi a arrexonai asuba de is gliagas de su traballu in Sardigna e prusatotu de su chi ferrit a is giòvanus apustis de ai pigau su tìtulu, s'acrarat: "In custa terra sa situatzioni de su mercau iat a depi pediri figuras annestradas, ma est totu incasillau. In Sardigna custa istòria no andat ainnantis de seguru de su 2008 e duncas iat a abisogiai un'anàlisi chi no pighit in cunsidèriu scéti sa crisi econòmica, poita a custa in s'ìsula s'aciungint totu una fibera de motivus istruturalis.Is diversas acontéssias s'amuntonat e ddoi at totu un'arringhera de situatzionis inghisciadas, e a su chi parrit, chi no si podint reformai. Scéti po fai un'esempru, in su cumpartu de sa gestioni de sa cultura, chi cuntenit bibliotecas, arcivus e museus, si bivit unu blocu fillu de is determinus chi si funt pigaus in is pranus artus de sa Regioni Autònoma de Sardigna, e chi unus cantu de annus fait no at fatu passai su progetu Paris, unu progetu chi previdiat sa gestioni de parti de un'enti regionali ùnicu de bibliotecas, museus e arcivus. Est a nai, po essi prus crarus, ca is comunus chi tenint bibliotecas, tenint una gestioni de benis librarius fata de is coperativas privadas chi pigant s'apaltu. E custu bolit nai ca chini traballat in custu cumpartu bivit una cunditzioni maba meda de precariedadi, poita arriscat de s'agatai chentza de traballu de un'annu a s'àteru, a dògnia rennovu de apaltu. E a nai ca Alessandro, "candu at essi mannu" isperat de fai su bibliotecàriu.
Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda
© RIPRODUZIONE RISERVATA
In tempus de crisi
Progetu realizadu cun sa partetzipatzione de sa Regione Autònoma de Sardigna – L.R. 26/97 subra sa limba e sa cultura sarda
Image
