S'istória de Teresa, una filla de ànima de Sardigna chi bisat s'amaistramentu
Image
(In Tempus de crisi) – Casteddu, 13 de su mesi de arbili – Filla de ànima de Sardigna, Teresa, napulitana, laureada in Psicologia in sa Sapienza de Roma cun d-unu caminu in Psicologia Crínica e de Comunidadi, fueddendi cun nos si narat: "Sa punna mia candu apu inghitzau su cursu de istúdiu furiat sa de fai unu caminu aintru de sa politzia fintzas a lompi a fai sa Criminologa", ma a dolu mannu, cun tristura, sa picioca si ndi acatat ca su percursu de fai est longu meda, caru e cun pagus possibilidadis de traballu, poita - s'acrarat - "is postus po is criminologus funt pagu meda, e is chi ddoi funt po su prus no benint donaus a chini est meritosu". Est po custu, difatis, ca Teresa at iscerau Psicologia Crínica. E tocat a nai puru ca s'annestru post lauream dd'at agiudada a cumprendi ca custu traballu ddi at essi praxu diaderus. Unu caminu longu su chi at fatu sa psicòloga de Uda. Agoa de cincu annus de istúdiu est lómpia sa laurea, e a pustis s'esamu de istadu, s'iscritzioni in su registru de is psicòlogus e galu po podi fai su psicoterapeuta de privau iat a tocai a fai un'iscola de annestru de àterus cincu annus, a dolu mannu paghendi. "Seus fueddendi - si pretzisat - de una tzirfa de 400 eurus a su mesi su prus pagu po cincu annus". Teresa po malasorti no at tentu su dinai po portai a cumprimentu su bisu de s'amaistrai e s'est dépia adatai a su chi passat su "cumbentu", est a nai una laurea chentza de amaistramentu. Su títulu pigau at portau a sa filla de ànima de Sardigna, a imbiai curruculum po podi traballai comenti istitutora. E atuendi isclamat "poita chentza de traballai no podeus abarrai!". S'est incarrerau in custa manera su traballu suu, "chi - si marcat - ismenguat unu pagu sa frigura de su psicòlogu, ma chi imbratzat un'istilu prus afatenti a su chi seu". "Sa laurea duncas - sighit - m'at portau a essi una psicòloga, ma m'at lassau chentza de s'amaistramentu biu s'auséntzia de su dinai" e chistiona chistiona cun Teresa ndi essit a pillu ca s'amaistramentu est cosa scéti po chini est benistanti. Arrexonendi de Sardigna po sa filla de ànima de custa terra, is problemas chi ferrint a is laureaus sardus funt is mantessi de totus is chi pigant su títulu, cun d-un'agravamentu in prus, ca in Sardigna su fenómenu est prus cracau."Candu s'iscerat s'universidadi - afirmat - s'incumentzat unu caminu cun d-una fiberas de aficus, chi benit de sa família tua puru, chi bit sa laurea comenti sa baga manna po agatai unu traballu bellu e chi bistat beni su títulu pigau, po fai fiamenti una vida chi no siat sa de unu pedditzoni" "Agoa perou - sighit - atumbaus cun sa realidadi chi po abisóngiu s'obrigat a fai calisisiat traballu". Is arragus po sa psicòloga de Uda funt totus fillus de unu territóriu chi no agiudat a is laureaus a sa fini de su caminu de imparu insoru, liendiddis is possibilidadis puru, comenti acontessit a is chi no tenint su dinai po sighiri a istudiai po s'amaistrai. Teresa si narat cun prexu de essi satisfada de su traballu chi fait, "puru si, - si pretzisat - no est unu traballu de fai po totu sa vida". In coru suu sa psicòloga bisat sèmpiri de arrennesci, una diri, a s'annestrai, e afirmat ca ddu bolit fai prusatotu poita chentza de annestru sa laura pigada no serbit a nudda. "Seus istudiaus meda po calencuna cosa e pagu po àteras". Ma a dolu mannu biu is costus de is amaistramentus no ddi parrit una cosa simpli meda.
Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda
© RIPRODUZIONE RISERVATA
In tempus de crisi
Progetu realizadu cun sa partetzipatzione de sa Regione Autònoma de Sardigna – L.R. 26/97 subra sa limba e sa cultura sarda
Image
