Ccsvi: sa Sardigna puru narat ca eja a sa Sperimentatzioni de su Métodu Zamboni

Ascurta custa nova


(S’úrtima nova) – Casteddu, 27 de su mesi de martzu – Ita est sa Ccsvi? Est sa sigla impitada po inditai s'Insufficiéntzia Venosa Crónica Cerbeddu-Spinali, una maladia iscoberta de su Professori Paulu Zamboni, diretori de su Tzentru Maladias de is Venas de Ferrara, cun s'agiudu de su datori Salvi, neurologu de s'ispidali Bellaria de Bologna. Sa Ccsvi est una patologia de is venas. Is tupamentus arteriosus ocasionat difatis un'iscurrimentu iscassu de su sàmbini de su cerbeddu e de su moeddu spinali abbia de su coru cun su corrispondenti incarreramentu de sa circulatzioni collaterali. Ndi derivat unu staniamentu crónicu de su sàmbini aintru de su sistema nervosu tzentrali, chi impedit sa supressioni giusta de iscórias e faneus, e favoressit puru un'irregulari muntoni de ferru chi si depositat aintru de su S.N.C. Ma poita fueddaus de Ccsvi? Poita in is circas suas su professori Zamboni at agatau un'importanti acapiu de sa Ccsvi cun sa Sclerosi Multipla, a manera chi in totu su mundu oi si mandant a innantis istudius chi cunfirmant is teorias de Zamboni. Su spricullitu prus mannu fatu po averguai sa valididai est stétiu su de su Neuroimaging Analysis Center de Buffalo: ingíriu a su tratamentu de sa Ccsvi in is malàdius de Sclerosi Multipla, i datus pubblicaus amostant una melloria de sa circolatzioni de is venas cerebralis e un'irminorigamentu de su númeru de recaidas e de lesionis ativas, e una melloria puru de sa calidadi de sa vida, mentris in sugetus chi tenint sa Sclerosi Multipla progressiva custu cursu si frimat o rallentat.  Segundu cantu est stétiu pubblicau, custu métodu, si allonghiau po 2 annus, est de si cunsiderai cun atentzioni comenti tratamentu brofetosu contra a sa Sclerosi Multipla, e de aciungi a is tratamentus chi ddoi funt giai. De cida passada, in Sardigna puru, innoia su pesu de sa maladia est grai meda, s'alluit un'ispériu po is chi sunfrint de custa patologia. Su consillu regionali at difatis aprovau sa motzioni de Taniebi Cocco, Adrianu Salis, Giuannicu Mariani e Arrobertu Capelli, chi pedit de incarrerai puru in s'ísula sa sperimentatzioni de su métodu Zamboni. Imoi at a cumentzai su caminu chi iat a depi portai a su finantziamentu de sa sperimentatzioni. Taniebi Cocco at pediu chi s'incarrerint debressi tzentrus de sperimentatzioni de protocollu cun s'adotadura de istrumentus de diàgnosi in is Asl de Nùgoro, Tàtari e Casteddu. E bosàterus ita ndi petzasis? Sa redatzioni de IlMinuto torrat cras cun d-un’àtera puntada de S’úrtima nova: unu progetu chi bit a su ligidori protagonista de su giornali inditendi is novas chi fueddant de Sardigna e chi po issu funt de importu mannu.

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda