De sa Sardigna unu dilúviu de EJA contr’a su nucleari

(Chistionis e Opinionis) - Casteddu, 19 de su mes'e maju - Is diris de sa Vardania in Teulada e in Quirra, sa grandu manifestada populari de su 26 de su mes'e martzu in Casteddu, is centinas de assembreas in totu su territóriu e is adesivus apicigaius in dógnia logu, e puru sa batalla  manna in Facebook. Is ativistas de su Cumitau Sinonucle chi cenàraba 13 de su mes'e maju, a is 19.30, ant serrau cun d-una pralladedda in pratza Gramsci, in Casteddu, sa campagna de su Cumitau etotu furiant scéti pagus dexinas, ma furiant segurus de sa bonesa e de sa calidadi de sa campagna referendaria. Sensatzioni cunfrimada de s'arrisurtau de is urnas: sàbudu e domínigu 15 e 16 de su mes'e maju pagu prus de 850milla sardus ant difatis frimmau su camminu a sa torrada de su nucleari narendi unu nono craru a su fàbbricu de centralis nuclearis e de depósitu po aremus radioativus in s'Ísula. Si sa destrossa de Fukushima at torrau a fai bivi a su mundu su bisu malu de su nucleari, acostendusì a su 98% de is EJA contr'a s'àtomu sa Sardigna donat unu messagiu senz'e torrada a s'umanidadi - narat su cordinadori de su Cumitau Sinonucle Bustianu Cumpostu - chi si ndi pesat de unu póbulu pitiu, chi tenit perou un'istória manna. Su messagiu 'Po unu mundu líberu de su nucleari' est scritu cun su linguàgiu universali de sa música e at a arribbai a totu sa genti chi bolit un'àteru tipu de raportu cun mammai terra".
Prexau meda de s'arrisurtau de su referendum puru su presindenti de sa Regioni Sardigna Ugu Cappellacci, chi at scéberau de fai fai su referendum consultivu asuba de su nucleari in is mantessi diris de is eletzionis ammistrativas. "Sa Sardigna - at cummentau Cappellacci - est stetia capassi de donai una proa de unidadi asuba de unu tema chi ghiat su tempus benidori de sa terra nostra e de is fillus nostrus".
"In su pópulu sardu - precisat su Diretivu natzionali de a Manca pro s’Indipendentzia - est ammanniendi una cuscéntzia chi parriat drommia, sa cuscéntzia de essi unu pópulu chi podit e depit decídiri a solu". Tra is protagonistas de sa lota contr'a su nucleari, aMpI at sceberau de fai una campagna referendaria autónoma cun diversas assembreas in su territóriu.
E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda