S'agunia de is trasportus

(Chistionis e Opinionis) - Casteddu, 23 de du mes''e arbili - 1,5 millionis de chilómitrus de mancu fattus de is postalis in is istradas sardas a s'annu, sa suspensioni a tempus indeterminau de su Trenixeddu Birdi in totus is línias turisticas de sa Sardigna, sa supressioni de su 30 po centu de is serbítzius ferroviarius po is pendularis e is istudiantis e - sa noa est de martis - 148 traballadoris postus in mobilidadi. Funt custas - narant is sindacaus - unus cantu de is cusseguéntzias grais de su dinai liau a su cumpartu de is trasportus púbblicus po mori de sa Finantziaria italiana, de cussa sarda e de una delíbbera aprovada de sa Giunta regionali a sa fin'e de su 2010. 18 millionis de eurus de mancu po s'Arst: aziendha a su 100% de propriedadi de sa Regioni Sardigna. Dinai liau senz'e cuscéntzia, chi ammenguat sa calidadi giai bàscia de is trasportus púbblicus in s'Ísula. Su raportu Crenos de su 2010 - scritu primu de ndi liai su dinai - est difatis implacàbili. Segundu cantu denuciàt s'annu passau su documentu de su Centru Circas Nord Sud, "Sa Sardigna no tenit una retza ferroviaria cumpetitiva, po mori de s'auséntzia de is binàrius dópius e de una retza eletrificada po una parti manna de su camminu, mentris is mésus púbblicus disponìbilis funt mancantis de unu parri chi castiat a sa spartzinadura territoriali de sa genti". Sa Sardigna tenit 13 postalis dógnia 100 chilómitrus cuadraus: una cifra - precisat su Crenos - "meda asuta de sa Media italiana e de cussa de su Mesudí". In pagu fueddus: po chini bivit in Sardigna e no tenit una màchina po si movi sa situatzioni est grai meda. Ma in Sardigna puru is cunditzionis de is istradas fait pena meda. S'acuntèssia senz'e fini de sa Tàtari-Terranòa - cun is 79 mortus suus in 15 annus - est unu símbolu, ma no est un'eccetzioni. Is statisticas fueddant craru. Cun 9 mortus de incidenti stradali dógnia 100milla abitantis, in is stradas sardas est prus fàcili perdi sa vida chi in sa media de su stadu italianu e de su Meridioni. A is arragus - e a s'arriscu - de viagiai in su coru de su territóriu sardu, s'aciungit s'isolamentu fortzau, po mori de sa carestia de is traghetus chi collegant sa Sardigna a sa penísula. Unu corpu mannu po su turismu e po s'ecunumia, argumentu de una de is úrtimas puntadas de Chistionis e Opinionis.
E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda