Binti consilleris regionalis de mancu. Rispàrmiu o truncadura de sa democratzia?

(Chistionis e Opinionis) - Casteddu, 29 de su mes''e martzu - Ammenguai a su númeru de is consilleris regionalis de sa Regioni Autónoma de sa Sardigna de 80 a 60. Est cantu proponit una delíbbera aprovada in is diris passadas de sa Giunta regionali. S'aprou de custa proposta de mudífica a s'artículu 16 de su Statutu ispeciali de sa Sardigna iat a podi portai diaderus a un'irminorigamentu de is privilégius de sa "classi política"? O cussu chi si progetat est unu "tàgliu de sa democratzia" a is pabas de is minorias políticas? Sa Giunta regionali, in concretu, proponit su tàgliu de 20 consilleris regionalis, cun d-un'irminorigamentu de is "costus de sa política". Ma sa delíbbera no previdit nisciunu tàgliu a is pagas arricias de is eligius in s'Assembrea regionali de bia Roma. Po su presidenti de sa Giunta regionali Ugo Cappellacci "sa proposta est unu primu indicu cuncretu chi intrat in su dibbàtidu imbusticau e mannu meda de is riformas e in sa chistioni de s'irminorigamentu de is rapresentantis chi si podint eligi". Sa Cummissioni Autonomia in Consillu regionali dda pensat diversamenti e cumbidat a sa Giunta e a is partidus políticus a torrai agoa. Su presidenti de sa Cummissioni Autonomia Paolo Pittalis (Pdl) e su vicipresidenti Tarcisio Agus (Pd) ammentant cun d-una nota de imprenta chi s'argumentu tratau n.41, aprovau de su Consillu regionali in su mes''e totussantus, donat a sa Cummissioni Autonomia su cómpitu de s'ocupai de s'irminorigamentu de is eligius. Pittalis e Agus cumbidant duncas a is partis políticas e a sa Giunta regionali a suspèndiri dógnia iniziativa autónoma in matéria de riformas. Cuntrària a s'irminorigamentu de su númeru de is consilleris regionalis est invecis Claudia Zuncheddu. Cun sa proposta de lei 206 sa consillera regionali indipendentista proponit unus cantu normas po s'irminorigamentu de is costus de sa política "a fac''e sa crisi económica chi est trumbullendi meda a sa sociedadi sarda". Sa proposta de Zuncheddu narat de ndi liai su 50 po centu de is pagas arricias de is consilleris e de ndi liai puru àteras régulas chi iant a podi portai a su rispàrmiu de casi 7 millionis de eurus a s'annu. Su 3 po centu de totu sa finatziaria de su 2010. Sa rapresentanti indipendentista perou narat nou a s'irminorigamentu de is eligius. "Cun sa proposta de sa Giunta - narat Zuncheddu - si ndi liat sa rapresentàntzia in sedi istitutzionali a is minorias políticas chi funt meda presentis in su territóriu nostru e chi funt parti de s'istoria de su pópulu e de sa natzioni sarda".
E bosàterus ita ndi pensais?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda