Militante compudadu, sa solidariedade de A Foras

Custu mangianu ant compidadu sa domo de unu giòvanu (in ue issu etotu istat cun su babbu, sa mama e una sorrighedda) acusadu de àere imbrutadu sas sede de s’assòtziu Sardos pro Israele. Est gasi chi leghimus in sa nota de solidariedade istèrrida e difusa dae sa rete A Foras Contra a s’ocupatzione militare de sa Sardigna. Nota dae ue leghimus chi su de custu mangianu est «un’atu chi punnat a intimidire s’ativismu de su cumpàngiu». «Chie si siat siat apat fatu s’atzione atribuida a su militante – narant – no agatat in nois afeu e disaprovu. Israele est faghende unu genotzìdiu e galu custa cosa colant in segundu pianu. E non ca semus antisemitas, nois nos oponimus a cada discriminatzione ratziale o de cale si siat fide religiosa, ma ca sa polìtica italiana e totu sos tzeracos suos sunt sionistas e còmplitzes de su chi Israele est faghende in Palestina».