Dae sa Nurra s'apellu a su fronte comune contra a s'ispeculatzione energètica

Fintzas in sa Nurra sos movimentos contra a s’ispeculatzione energètica sunt artziende sa conca. Su comitadu locale, nàschidu a concruos de ghennàrgiu de ocannu, est gherrende contra a 68 progetos in su territòriu, chi diant contribuire a sa produtzione prevìdida de 6 GW e barda pro totu sa provìntzia de Tàtari (tzifra prus manna de sa cantidade rechesta dae su guvernu a totu s’ìsula). «Invitamus duncas sos tzitadinos, sos traballadores, sos assòtzios, sos comitados e sos movimentos a si unire a s’impignu nostru in defensa de s’ambiente e de su benidore de Sardigna. Est lòmpida s’ora de artziare sa boghe e de fàghere unu fronte comune contra a chie cheret isrobbare sa terra e sas resursas nostras».