Votatziones. Bobore Sechi intre sos 7 "impresentàbiles". Sa defensa de s'assòtziu Libertade: «Un’istòria de repressione e de giustìtzia mala»

De totu sos candidados chi custas dies sunt chirchende votos pro si nche sètzere in su Cussìgiu, sete sunt “impresntàbiles”. A su nessi custu est su chi narat sa cummissione parlamentare antimafia in sede de verìficas de sa violatzione de su còdighe de autoregulamentatzione. Sos nùmenes sunt custos: s’assessora uscente de s’Agricultura Valeria Satta (Lega), Valerio De Giorgi (Dc Rotondi), Maria Grazia Giordo (Sinistra futura), Sergio Oriti Niosi (Forza Italia), Antonello Peru (Sardegna al centro 20venti), Giovanni Satta (Alleanza Sardegna-Pli) e Salvatore Sechi (LibeRU). Pro ite Bobore? Ca resurtat galu imputadu cun s’acusa de assòtziu eversivu a pustis de 22 annos dae s’operatzione Arcadia. Lestru est essidu su comunicadu de Libertade narende chi «s’acusa de apartènnere a s’Oir e a su Npc la fraigheint petzi cun intertzetatziones sestadas a mesura». Pro Libertade est «un’istòria de repressione e de giustìtzia mala». A pustis de 22 annos b’at galu 17 persones (cun Bobore 18) imputadas e su protzessu est malu a finire.