Sèrie A. Làstima Cagliari in Bologna cun sa segunda derrota sua

BOLOGNA (4-2-3-1): Lukasz Skorupski, Stefan Posch (87’ Lorenzo De Silvestri), Sam Beukema, John Lucumi, Victor Kristiansen, Nikola Moro (66’ Kacsper Urbanski), Michel Aebischer (87’ Oussama El Azzouzi), Dan Ndoye (66’ Riccardo Orsolini), Lewis Ferguson, Jesper Karlsson (87’ Giovanni Fabbian), Joshua Zirkzee. Allenadore: Thiago Motta

CAGLIARI (4-4-2) Boris Radunović, Gabriele Zappa (66’ Alessandro Deiola), Alberto Dossena, Mateusz Wieteska, Tommaso Augello (70’ Paulo Azzi), Nahitan Nández (45’ Alessandro Di Pardo), Antoine Makoumbou, Ibrahim Sulemana, Jakub Jankto (66’ Gaetano Oristanio), Andrea Petagna (45’ Eldor Shomurodov), Zito Luvumbo. Allenadore: Claudio Ranieri

Retes: 21’ Luvumbo, 59’ Zirkee, 90’ Fabbian

Ammonidos: ‘40 Ferguson, 70’ Sulemana

Àrbitru: Daniele Orsato

Trasferta in cherta de unu resurtadu ùtile, cando non de sa vitòria, sa de sos de Ranieri a pustis de unu comintzu bonu (su 0-0 in Torinu) e sa derrota contra a s’Inter (0-2 in Casteddu). In cherta de su primu goal, pro seguru, chi est arribadu a su de 22 minutos cun Luvumbo (su primu suo in sèrie A). Comintzende su contu, però, cheret naradu deretu chi sas duas iscuadras (casteddajos in màllia arba) ant rispetadu unu minutu de silèntziu pro sos mortos traballende sa die colada. A pagos minutos dae su frùschiu de via sunt sos meres de domo a si mustrare perigulosos cun Karlsson dae sos trinta metros cun botza prepotente contra a sa rugradura de sos palos. Bologna torra perigulosu a su de 14 cun Zirkzee chi bi proat in tretos de su palu de dereta: bi la viant. Ma acò su Cagliari chi comintzat a iscuidare finas a cando non bi pensat Luvumbo befende·si·nde de Beukema e lassende a buca aberta a Skorupski cun tiru mànchinu. Sa rete casteddaja est una tirade de origras a sos bolognesos, chi non si podent permìtere de si canzolare: gasi a, a unu cuartu de ora dae sos concruos de su primu tempus cun Karlsson e Zirkee chi, fatu fatu s’unu dae s’àteru, proant a paregiare sos contos. Ma Radunovic narat chi nono a ambos duos. Su parègiu de sos emilianos acò·lu in sa ripresa: a su de 59 minutos Moro verticalizat cun Kristianses e custu a filu de terra serbit a Zirkee chi non si la faddit. Custu giru Radunovic nudda podet. A su de 73’ su pipioleddu de Orsato frùschiat unu rigore e sos ogros de su Var lu cunfirmant: su de Di Pardo firmende su passàgiu traessu de Kristiansen est fallu de manu. Dae sos ùndighi metros iscudet Orsolini, ma iscudet a sa traversa. Su Cagliari nd’aprofitat cun Luvumbo chi in antis (a su de 80’) serbit, ma de badas, a Makoumbou e a pustis (a su de 82) proat su cros ma agatat sos pùngios de Skorupski chi impedint a sa botza de fàghere dannu. Su Bologna però marcat sa rete de sa vitòria cun Fabban. Mancu intradu nd’aprofitat de un’errore de Radunovic: su portieri casteddaju si lassat fuire sa botza a pustis de unu tiru de Kristiansen e su tzentrucampista non perdonat. Podet andare finas peus a su de 93’, ma su Var annullat una rete a Zirkee resurtadu in foras de giogu. Duncas nen resurtadu ùtile nen vitòria. Su Cagliari cun custa segunda derrota dêt àere de ite meledare in custas dies.