Ranieri: «Bologna de calidade. Nois? Chie faddit pagat»

«Las connoschìamus sas calidades de su Bologna, est un’iscuadra chi la tenet sa botza e aìamus preparadu sa gara fintzas movende dae custu. A su portieri nostru, a banda duas o tres paradas de importu, no lu fiant impignende meda, ma cando ses binchende non podes fartare gasi comente amus fatu. Una làstima, ischimus chi sa Sèrie A custa est, e comente faddis pagas. Como est a reagire». Custos sos faeddos de mister Ranieri a pustis de sa derrota de eris contra a su Bologna. Analizende sa gara at annantu chi «in su segundu tempus non est mancadu Petagna, aìamus a issu comente puntu de riferimentu a punta in susu, cun Nandez in agiudu e Luvumbo in atzione a lestru. Apo dèvidu bogare su tzentravanti nostru pro unu fastìgiu a su pische de s’anca e finas Nandez fiat a dolore de nàdiga». Sos àteros giogadores? «Wieteska est de vàllia, cun esperièntzia. Dossena e Obert sunt protzedende bene, tocat a crèschere in cussèntzia, partida cun partida. Radunovic? A Boris nudda de li nàrrere amus, a sèrie A nos nch’at giutu. Andemus a in antis paris, cun cunfiàntzia».