Su Cagliari perdet sa segunda contra a s'Inter

CAGLIARI (4-4-2): Radunovic, Zappa, Dossena, Obert, Augello, Nandez, Makoumbou, Sulemana, Jankto (60’ Azzi), Oristanio (46’ Di Pardo), Pavoletti (35’ Luvumbo). Allenadore: Ranieri.

INTER (3-5-2): Sommer, Darmian, De Vrij, Bastoni, Dumfries (71’ Cuadrado), Barella (71’ Frattesi), Calhanoglu, Mkhitaryan, Dimarco (71’ Carlos Augusto), Thuram (77’ Arnautović), Lautaro. Allenadore: Inzaghi.

Retes: Dumfries (20'), Lautaro (28')

Àrbitru: Michele Fabbri

Male sa segunda. S’Inter est bènnidu a Sardigna pro bìnchere e cun sa vitòria si nche torrat a Milanu. In totu sunt 18, cun sa de oe, sas conchistas de sos nieddu-biaitos in su retàngulu birde casteddaju (85 sos disafios in ambos campos cun 43 a favore de sos ambrosianos, 14 a favore de su Cagliari e 28 sos parègios). S’Inter at mustradu deretu sas intentziones suas acurtziende·si·nche a sa rete cun Lautaro chi, a su de 14 minutos, at tzentradu su palu. Su Cagliari at proadu a reagire faghende·si perigulosu duos minutos a pustis cun Pavoletti ma a su de 20 Thuram at serbidu sa botza a Dumfries chi nche l’at tzacada a intro mancari sa pressione de Sulemana. Sos casteddajos ant proadu a paregiare in antis cun Nandez (botza deviada a su cugione dae Calhanoglu) e a pustis cun Pavoletti chi at iscutu arta sa botza retzida dae tiru traessu de Zappa. A su 28 su raddòpiu interista cun botza iscambiada intre Thuram e Dimarco e a pustis serbida a Lautaro pro s’acumprimentu de sa faina. Intre càmbios de giogadores, ocasiones brusiadas, unu rigore reclamadu dae su Cagliari, un’àteru palu de s’Inter e chimbe minutos de recùperu sa partida est finida cun sos casteddajos a manos iscutas e firmos a unu puntu ebbia in duas garas.