Eòlicu. Fintzas s'Anci pro sa "moratòria"

In die de manifestatzione de sos comitados contra a s’ispeculatzione, s’Anci Sardegna, assòtziu chi aunit sos Comunes sardos, at aprovadu unu documentu pedende de blocare sos mega impiantos de produtzione energètica dae fonte rinnovàbile pro chi b’apat una transitzione ecològica «ecuànime, giusta e democràtica».

Un bia istèrridu, su documentu nche l’ant imbiadu a sos cabos de grupu in Consìgiu, a su Presidente de s’assemblea Michele Pais e a su de sa Giunta Christian Solinas. S’Anci non nch’essit dae sos paràmetros europeos de sa Next Generation Ue. Pro nche barigare su modellu de produtzione dae sas fontes fòssiles petzi punnat a unu sistema de règulas chi movat dae «cuotas ecuànimes assignadas a sas Regiones».

S’Anci Sardegna est pedende in prus una una revisione normativa che previdat sos «pàrreres vinculantes de sos Entes locales e de sa Regione pro sos chi lis narant “grandi impianti”» e «s’individuatzione de sas àreas idoneas». Intre sas àteras chistiones pesadas agatamus as formas de perecuatzione «de torrare a bìdere», s’initziativa pùblica «de pigare in cunsideru cun investimentos regionales», sas comunidades energèticas (garantende «s’autonomia de sos Comunes pianifichende su territòriu issoro»).

M.P.