Un'insetitzida naturale dae s'erba de gatos

Camèdriu, sudorea, erba de gatos, istocapadeddas, isculapadedda, isturridana, manteddada, cruma, murguleu, erba pùdida, allupacuaddus (e gasi sighende sos inditos de Toninu Rubattu). Semus faeddende de su Teucrium marum, famìlia de sas Lamiatzeas, sa matessi de s’armidda e de su romasinu. Sa noa est chi in custa pranta b’at una biomolècola – su Dolichodial – cun atzione insetitzida. Sa cosa essit a campu pro more de una chirca de s’Universidade de Tàtari capu filera de sau progetu PNRR e.INS – Ecosystem of Innovation for Next Generation Sardinia. Sos chircadores Emmanuele Farris e Alfredo Maccioni de su Dipartimentu de Iscièntzias chìmicas, fìsicas, matemàticas e naturales ant collaboradu cun sa dotoranda de s’Universidade de Casteddu Silvia Macis e cun Marc Gibernau, senior researcher in s’Universidade de sa Còrsica. «Custa chirca – narat Farris – rapresentat un’esèmpiu clàssicu de investigatzione iscientìfica de tipu ecològicu cun efetos mannos in contu de potentzialidade econòmica».