Su prus caente mese de trìulas intre sos registrados dae su '79

Aprofundimentu de su mèrcuris - Su mese de trìulas est interinende·si·nche. Su bentu maistru chi at mudadu s’àera in custas dies, a pustis de una calura mala a bajulare forsis fintzas dae sa chìgula, no at a mudare pro seguru su record marcadu in su cartolàriu abertu su ‘79 (cando comintzeint a rilevare sas temperaduras de su praneta pro mèdiu de tecnologias satellitares).

Duncas, dae tando, su mese de trìulas est su prus caente mai registradu. Record cunfirmadu dae su Climate Change Service de Copernicus, su programma de collaboratzione iscientìfica de s’Unione Europea, e dae su Wmo, s’organizatzione meteorològica mundiale. Sa prima e sa de tres chidas de su mese colende·nche·lu sa temperadura globale nch’at coladu su lìmite de 1,5° in prus cunforma a sas temperaduras mesanas pre-industriales (1850-1900). Duncas amus coladu su lìmite de s’Acòrdiu climàticu de Parigi de su 2015, cando chentu norantaghimbe paisos lu firmeint.

Sa Wmo, su mese de maju aiat naradu chi «the chance of global near-surface temperature exceeding 1.5°C above preindustrial levels for at least one year between 2023 and 2027 is more likely than not (66%)». Ma non b’at problema! Ca sa Wmo matessi narat chi nche semus in foras de s’obietivu si nche lu barigamus pro nessi binti annos.

De custa manera, ipòtesi, colende·nche·lu (e de cantu?) pro 19 annos (s’unu in fatu a s’àteru o a annos bàrigos?), non nche semus in foras de s’obietivu de sa cunferèntzia parigina. Non b’at male, no. Sas abbas faladas in maju e su gràndine de pagas dies a como ant a èssere sos prus lenos cunforma a sos chi amus a connòschere? S’istiu de custu trìulas at a èssere prus friscu de sos imbenientes? In s’ìnteri chi istamus gioghende cun sos datos e impreende sas tzifras a praghere nostru (a praghere nostru mànigu de trudda! su 1.5 de Parigi fiat unu lìmite polìticu essidu a campu a pustis de maicantos cumpromissos), su disacatu lu semus bidende die cun die.