Sos giornales de oe #063

«Sa Sardigna est unu furraghe. Fintzas eris colados sos 40 grados in prus de unu logu, ma s’abbratzu angustiosu de su calore est sena pasu. Oe e cras allerta arantzu, cun crèschidas de sas temperaduras in tretos de Casteddu. E non sunt bonas sas prospetivas, ca nch’amus a colare dae un’antitziclone a s’àteru, dae Tzèrberu a Caronte, fintzas prus àrridu».

E non sunt bonas noas. E non sunt bonas dies. Ma comintzamus custa rassigna de oe movende dae sa prus de importu chi nos dat L’Unione sarda chi in prima antìtzipat finamentas «comente si difendent sos sardos».

E mancari La Nuova Sardegna abèrgiat cun sa crèschida non de sas temperaduras ma de sos mùtuos («In Sardigna b’at mùtuos ativos pro 8,4 milliardos, 5,6 sunt a tassu variàbile, su 22% de su totale, chi in custos ùrtimos meses sunt crèschidos meda»), in fundu de pàgina podimus lèghere de sos primos ricòveros pro s’undada de calore: «Patzientes sensìbiles o intrados in edade. S’allerta abarrat arta ma dae cras amus a torrare a temperaduras prus umanas. Unu pasu curtzu, ca martis lompet un’undada noa. Su record in Belchidda cun 43,5 grados».

E, torrende a su patziente de Arbus, beh, custa noa est bona: non fiat colera. Sa cunfirma lompet dae su Dipartimentu de maladias infetivas de s’Istitutu superiore de sa Sanidade. E chi est bona noa lu narat puru s’assessore regionale Carlo Doria, prontu issu: «Una bona noa in una situatzione bene gestida dae su sistema sanitàriu regionale cun su coordinamentu de s’assessoradu».

Naturale, su coordinamentu de s’assessoradu de s’Istrutzione pùblica non b’intrat nudda cun sos resurtos de su test Invalsi chi nos narant (La Nuova) chi «sèighi istudiantes de chentu tenent unu diploma in butzaca ma non sas cumpetèntzias bàsicas in matèrias fundamentales comente italianu, matemàtica e inglesu».

Unu resurtu “mègius” de s’annu coladu ma peus de sa mèdia italiana (9 de 100). Como diat èssere finamentas fàtzile a nch’essire in brulla, ma a beru – mentovende sa matemàtica – sos contos non torrant si pensamus a cantas bias narant chi su sardu no est de giudu ma lu sunt s’italianu e s’inglesu. Chi los potzamus imparare mègius ponende·bi in mesu fintzas sa limba nostra? Naturale, l’amus a pòdere iscobèrrere cando sos assessorados ant a coordinare a beru una polìtica linguìstica iscolàstica comente si tocat.

Peristantu b’at chie si preparat ca sos assessorados noos los ant a partzire a pustis de sas votatziones regionales. E sas votatziones cherent preparadas. E de su tzentru chi s’est organizende nde dant contu ambos duos sos giornales in edìcola.

«Eris in Nùgoro – nos contant dae Casteddu – ant faeddadu de assentos e de istrategias conca a sas regionales imbenientes Stefano Tunis e Antonello Peru de Sardegna al Centro 20Venti, Giuseppe Luigi Cucca de Azione e su cummissàriu de sa Dc in Sardigna Attilio Dedoni. Posca Giovanni Satta, vitze cabu de grupu de su Psd'Az in Cussìgiu regionale, ma a nùmene de Alleanza Sardegna, una formatzione noa cun in intro s'Uds (Unione di centro). Cun Satta at partetzipadu a sa mesa un’àteru cussigeri sardista: Franco Mula, dae tempus in cherta de si nch’essire dae su partidu de sos bator moros. E a curtzu a sas positziones de Alleanza Sardegna bi diant èssere fintzas àteros duos cussigeris sardistas, Piero Maieli e Stefano Schirru, e su retore de s'Universidade de Tàtari Gavino Mariotti. Non bi fiant, mancari invitados, Riformatori, Italia Viva e Udc».

«De prus no ischimus – nos contant dae Tàtari –, a su nessi a su presente, de custu Grandu tzentru. Comintzende dae sas làcanas: intradas noas o àteras essidas bi dênt àere? A cale ala si nch’ant a ghetare su 2024? Mistèriu fiat e mistèriu abarrat, fintzas a pustis de su conclave».

In s’Unione s’intervista a su senadore M5S Ettore Licheri chi beneighet su campu largu: «S’atmosfera est positiva». Nât chi.

A cras.