Sos giornales de oe #059

Si galu cherimus una fotografia econòmica de sa Sardigna no est totu in prima pàgina su chi agatamus oe. Pro nàrrere, in s’Unione b’est sa chistione de sas butzacas: «In s’Ìsula sa cursa maca de sos prejos. Consumadores vìtimas de s’ispeculatzione, perunu benefìtziu dae sa mèngua de s’inflatzione». E galu: «S’inflatzione frenat ma sas famìlias non si nde sunt sapidas. Mescamente in su carrellu de s’ispesa. Pro Federconsumatori b’at prus de unu suspetu: paritzas ispeculatziones in antis de su preju finale, una befe chi si nch’annanghet a sa cursa maca de sos mùtuos».

Dae Federconsumatori a Federalbergatori, ca imbetzes sa Nuova nos intregat unu capìtulu nou de sa carella intre s’assessore regionale e sos meres de sa categoria. Leghimus: «S’assessore de su Turismu Gianni Chessa contra a sos hotel: “Tenent prejos artos meda e pro custu no los prenant”. Sa risposta: “Tenimus costos prus artos ca semus in règula, sa dimanda est si custa Regione chèrgiat amparare su traballu nieddu”».

E, gasi, in su mentres chi pensamus a comente acollire sos turistas, in intro de sos giornales, de sa Nuova, b’at unu contu chi nou no est, ma chi l’ant fatu comente crònaca de sa presentatzione tataresa de su raportu Crenos 2022. Cun duos problemas mentovados dae unu reladore: «Una grandu dipendèntzia dae su pùblicu e sa situatzione demogràfica».

A banda su primu puntu (cando chi b’amus su pùblicu chi dipendet dae su mercadu prus de una bia, pensemus a sos espròpios privados pro “publica utilidade” pro permìtere de pònnere sas palas eòlicas o a s’indùstria de sa gherra in tretos intreos chi cherent innetiados e torrados a sa gente), su de sa natalidade est gasi acraridu: «Intre 20 o 30 annos amus a àere unu muntone de giòvanos in mancu e parte manna de sa populatzione at a èssere betza. Custu cheret nàrrere chi in paritzos ant a àere bisòngiu sighidu de sustegnu sanitàriu e pagos ant a èssere a tretu de produire resursas».

A beru devimus tìmere sos migrantes? A beru devimus dare audìtziu a su dissing intre Chessa e albergadores? No ca si cherimus lèghere de carchi àteru dissing b’est su de su chi agatamus in sas pàginas istiales intre Salmo e Lucchè. Su sèberu est grae.