Sos giornales de oe #057

Sos colores de sa contrada de sa “Selva” tinghent sas primas pàginas de sos giornales de oe sende chi Tittia de Nurri at torra bìnchidu su Palu de Siena. Giovanni Atzeni at binchidu su de 10 in totu e su de 5 s’unu in fatu a s’àteru. Ma si sighimus a abbaidare sas editziones in pessu lòmpidas a edìcola paret chi nois siamus galu in cussu momentu de tensione in antis de sa partèntzia, cando su caddu e su cadderi de sa “Chiocciola” non si detzidiat a si pònnere in lìnia cun sos àteros faghende trigare s’ispetàculu de sa cursa. Pro nàrrere, l’Unione aberit cun unu «Stop» a su fotovoltàicu peri sos lagos pro manu de sa regione, chi in su mentres pagu e nudda faghet pro s’invasione de s’eòlicu chi, semper mentovende s’Unione «est un’afare de 8 milliardos s’annu». Bi pensat finas sa Nuova a abarrare in modalidade “limbo” cun cun sa noa de su turismu e de su «boom» chi «no est galu lòmpidu» e cun sa Tàtari-S’Alighera chi, nât chi, l’ant a finire intro de su 2024.

Ma est su post de su lunis de l’Unione chi meresset meledu, a dae chi issu matessi est unu meledu chi movet dae su meledu de Briatore. A bisu de s’autore su chi at naradu su milliardàriu est una tontesa petzi ca l’at naradu issu, ma chi in fundu in fundu agigu de resone b’at. Semus faeddende de sa fràsia de sos fìgios de sos maistros de linna chi imbetzes de bi la sighire cun linna e metru tenent idea de si laureare. «De custa manera – serrat su post – in antis chi sa polìtica risolvat sos problemas unu muntone de traballos si nch’isperdent e sighimus a bìdere ingegneris, abogados, psicòlogos, giornalistas e ispetzialistas de su nudda». Sos giornales de oe no los at imprentados su linotipista.