Presidentes de Regione, Solinas galu a concruos de classìfica

Comente amus giai bidu in sa rassigna imprenta de oe, Christian Solinas nch’est galu a concruos de classìfica intre sos presidentes de sas Regiones de sa Repùblica italiana. Lu cunfirmat sa Governance poll chi cada annu sa Noto Sondaggi aprontat pro su giornale econòmicu-finantziàriu Il Sole 24 ore. Su presidente sardista, chi si diat chèrrere torrare a candidare ateruna borta punnende a mantènnere sa cadrea sua, est su 17 de sos 17 guvernadore ogetu de sondàgiu. Ùrtimu, duncas, e fintzas cun una mèngua pertzentuale: 39,5% s’annu coladu, 35 como. Una noa chi interessat a su tzentru manca chi dae pagas dies at batijadu su campu (prus chi non) largu. Ma chi interessat finamentas a Fratelli d’Italia in cherta de li pigare su logu a Solinas. In prima positzione su guvernadore emilianu Stefano Bonaccini, pro seguru fintzas pro mèdiu de su ruolu suo in s’emergèntzia alluvione: 69% (dae su 65 de su 2022) colende·nche a su vènetu Luca Zaia chi nche falat a segunda cun su 68,5% (dae su 70). (m.p.)

fonte immàgine Regione Sardegna