Ispopulamentu, su sèmene de Solinas. Chie contivìgiat su terrinu?

Iscadiant oe sos tèrmines pro pigare parte a su bandu regionale pro s’abertura de atividades noas o pro su trasferimentu de atividade in sos Comunes chi non lompent a 3.000 abitantes. De su situ de sa Regione leghimus chi «sunt belle 600 sas dimandas imbiadas a sas Càmeras de Cummèrtziu». Sa norma previdet sa cuntzessione de unu contributu de 15mìgia èuros (20mìgia si b’at incrementu ocupatzionale). Pro su presidente regionale Solinas, custa mesura (in pare cun sas 1.393 dimandas pro sa còmpora o s’acontzu de sa prima domo in sa matessi casta de Comune; e cun sas 1.442 famìlias chi su 2022 ant otènnidu su “bonus bebé”) est su «sèmene pro sa renàschida de sas biddas». Bene, como chert contivigiadu su terrinu. Ca pro chi sas prantas potzant brionire cheret chi b’apat terrinu si non bonu nessi contivigiadu. Custu cheret nàrrere a bìdere finamentas sas crititzidades ligadas a sos servìtzios pùblicos e a sa mobilidadae (datos ben contados in su raportu Crenos 2022).

m.p.