Fèstival "Percorsi Teatrali": ammentu a Marcel Marceau

Aprofundimentu de su chenàbura - Su fèstival "Percorsi Teatrali" ammentat a Marcel Marceau. S'apuntamentu est organizadu in Santu Lussùrgiu dae su "Teatro del Segno" e, ocannu lompet a sa de bìndighi editziones.

Dae su 28 de su mese de triulias a su 6 de su mese de austu in sa bidda de sa regione de su Montiferru at andare in iscena unu programma de addòbios ricu meda: ispetàculos, film, laboratòrios e cunvegnos ant a arrichire su panorama culturale de sa bidda.

Ocannu su fèstival est dedicadu a su mimu frantzesu Marcel Marceau, un'artista ispantosu chi, comente sutalìneat a ANSA su diretore artìsticu de su fèstival Stefano Ledda, at otentu sas craes de Santu Lussùrgiu. "Lu ammentamus in su chentenàriu de sa nàschida, e a bìndighi annos de sa morte sua", e lu ant a ammentare cun s'ispetàculu "L'incantatore di folle" de s'iranianu Saeed Fekri. Un'ispetàculu chi s'ispirat a su traballu de Marcel Marceau, in prus de sos de Charlie Chaplin e de Totò.

"Percorsi Teatrali" at a incumentzare chenàbura 28 de su mese de trìulas a sas 20.00 cun sas "Filastrocche N'Roll" de Renzo Cugis e Gianfranco Liori, s'incràs, sàbadu 29, s'addòbiu est cun"Incantesimi" de e cun Salvatore Della Villa, dae sas "Fiabe Italiane" regortas dae Italo Calvino.


Pro su 31 de su mese de trìulas sunt prevìdidos duos abbòbios cun "Terra Madre" e sos buratinos indanimados dae Paolo Cattaneo, a pustis b'at a èssere sa projetzione de "Bentu" de Salvatore Mereu.


Su 1 de su mese de austu at a tocare a "L'incantatore di folle" de e cun Saeed Fekri, mentras su 2 a "Io, Andersen" de e cun Marco Nateri in iscena cun Anna Paola Marturano. Si sighit su 3 de su mese de austu cun "Why Clitemnestra Why?" cun Miana Merisi dirigida dae Maria Assunta Calvisi. Su 4 s'ispetàculu est "Centodiciotto" de e cun Alessandro Congeddu e in fines su 6 de mese de austu at a tocare a "Io provo a volare" de e cun Gianfranco Berardi, Premio Ubu 2019, chi firmat, paris a Gabriella Casolari, dramaturgia e regia de "Omaggio a Domenico Modugno".