Sos giornales de oe #056

Su contu est su de s’addòbiu de eris intre sa croba barbuda Solinas-Doria e sos dipendentes (pagos) de su Brotzu. Un’addòbiu pensadu pro sos dipendentes ebbia, comente si podiat lèghere in sos cartellos postos intrende a s’istrutura. Duncas peruna intermediatzione sindacale mancari, comente leghimus in sos giornales de oe (ambos duos contende·nos·la) sos sindacados prus de una borta aiant pedidu (de badas) de si pòdere cunfrontare cun su guvernadore.

Bene, s’addòbiu l’ant fatu e, su criu nch’est totu inoghe, sa Regione sos ospidales noos los at a fàghere in tres annos e, finas a cando non sunt prontos, sos chi bi sunt ant a a sighire a funtzionare. Fintzas su Brotzu. Ma non si cumprendet comente, ca a un’ala Solina e Doria narant chi s’investimentu pro sa piastra de modernizatzione de su Brotzu «apartenet a unu capìtulu a banda», a s’àtera faghent sos «babbos de famìlia chi si devent preocupare de sas risorsas».

In pagas paràulas – si nde bogamus sa chistione de s’istàdiu – Truzzu e Solinas diant pòdere èssere finamentas de acordu. Sas duas positziones issoro sunt belle che pare. Eja a su nou, eja a sos betzos. Ma si est beru chi non s’ischit cantu b’at a chèrrere a fàghere sos noos (e cantu custu diat depotentziare sos betzos), pro sos primos galu non bi sunt sas àreas. Narat Solinas de àere «pedidu a su Comune una risposta, in antis lompet, in antis traballamus». Ma Truzzu giurat chi «a Comune non b’at lòmpidu rechesta peruna».

Cando est chi s’ant a illierare? In su mentres a una fèmina prìngia de tres meses diat pàrrere chi Areus (s’azienda pro sas emergèntzias-urgèntzias) no l’apat leada a traballare pròpiu ca est prìngia. Sa chistione - leghimus in sa Nuova - nch’at a lòmpere a Parlamentu pro mèdiu de interrogatzione Pd a su Guvernu.