Sos giornales de oe #055

Una noa chi paret diferente dae su contu de custas dies (istàdiu/ospidales) est sa chi ponet La Nuova Sardegna aberende s’editzione sua de oe. Est a nàrrere sa de sa fua de sos infermieris. «In Sardigna nde mancant nessi 2mìgia. In medas tzucant a foras de Itàlia. Àteros sèberant de mudare traballu». Amus lèghidu bene, non tzucant a Itàlia, ca fintzas in cue «su cumpensu non nche colat sos 27mìgia e s’oràriu de traballu est unu bisestru». Pro la truncare in curtzu, «turnos sena pasu e possibilidades de carriera torradas a nudda». In intro fintzas su contu de una professionista chi at seberadu de lassare su càmisu: «Apo bidu paritzos collegas meos in beste de malàidos sufrende de insònnia e cun ritmos cardìacos in foras de norma». In mesu a sas pàginas 2 e 3 sa foto de una protesta cun paràulas de òrdine chi a lis nàrrere craras e normales est pagu: «Assuntziones in prus, precariadu in mancu»; «Sos infermieris contivìgiant a sas persones ne nemos contivìgiat a issos».

E custa est duncas un’àtera cando faeddamus de sanidade mancari como sos contos pertochent sos ospidales noos ebbia, cun su tzentru dereta chi est partzidu e cun sos consigeris regionales chi eris non si sunt atopados ca est brincada sa setziada. Ma nos contat L’Unione sarda chi oe b’at una riunione tècnica intre Regione e Comune pro faeddare de s’istàdiu nou. Che chi totu pàrgiat subordinadu a su logu de fràigu de s’arena de su fùbalu. De prus, su matessi giornale intervistat oe a s’ex guvernadore Ugo Cappellacci. Chi lu narat a craru: istàdiu in Sant’Elia. De sos ospidales noos non narat nen chi nono nen chi emmo: «Giustu a potentziare s’oferta ma sos de primore che a su Brotzu gasi devent abarrare. Forsis b’at un’errore comunicativu».

Semper in s’Unione legimus de sa batalla de Biddanoa de Forru contra a sos palones eòlicos. In intro sos faeddos de si sìndigu Maurizio Onnis: «A su presente semus impignados istudiende sas mapas de su territòriu interessadas dae sos duos progetos. Est cosa grae ma indispensàbile pro cumprèndere sas intentziones de chie cheret pònnere sos palones. B’at prus de 130 partigheddas interessadas dae sos espròpios. Semus finamentas collende dinare pro pagare sos gastos legales de chie si cheret opònnere. A nemos chèrgio illùdere: capatze chi perdamus dinare e terrinos, ma sa dignidade nos imponet una batalla sena iscontos».