Sos giornales de oe #051

Est noa de eris sa de sa positzione de Fratelli d’Italia pro su chi pertocat sos ospidales noos chi sa Giunta (cun FdI in intro) cheret fraigare.

De custa manera, s’idea de nche lassare a banda sos progetos de modernizatzione de sos “betzos”, comintzende dae sa piastra tecnològica de su Brotzu, non de no agradare ebbia a sas oposiztiones, agatat oe sa contrariedade de su partidu de Meloni cun sos faeddos de sa senadora Antonella Zedda. Chi, in prus de non nche chèrrere ispèrdere su Brotzu, annanghet narende: «Disinnos che a custos meressent meledos fundudos ponende in parte totu sa coalitzione».

Su fogu de sa frama tricolore como est duncas contra a Solinas, cando chi sas dies coladas, cun abbas apasighende·si, sas caddaridas de Fdi fiant in cherta de uscrare sa sida de sas opositziones pro more de crìticas indiritzadas a s’acòrdiu de programma chi faeddaiat de s'ospidale nou (chi a mala gana bogat dinare a sa modernizatzione de su betzu-Brotzu)...e de s'istàdiu.

Si faghimus custa rassigna est ca sos giornales los leghimus. E su 7 amus lèghidu sas paràulas de su cabu de grupu Fdi Fauto Piga contra a progressistas e cumpàngios: «sa manca est faghende campagna eletorale cando chi Regione e Comune sunt comintzende a chistionare pro s’acumprimentu lestru: bi sunt totu sos presupostos pro chi s’istàdiu lu fatzamus luego».

E torremus a sa funtzione de una rassigna, ca est finamentas leghende sos giornales chi sa gente si faghet un’opinione e diat pòdere pregontare: su chistionu torra conflituale intre Regione e Comune (ca de custu semus faeddende mancari custu giru apat faeddadu una senadora) nudda b’intrat cun sa batalla interna pro sa ghia de sa coalitzione in sas regionales imbenientes? E su chistionu est torra conflituale pro more de s’ospidale o de s’istàdiu?

Amus a sighire custas crònacas ca dae cue ant a mòvere su bonu de sas chistiones in s’agenda eletorale dae como in susu.

E semper in riferimentu a campagnas eletorales la Nuova nos dat contu de s’addòbiu de majoria de chenàbura, de sos sardistas “4 Moros” chi dae tempus fiant in gherra cun Solinas (unu de custos est s’ex sìndigu sardista pasadinu Roberto Tola, giai candidadu sas regionales colaas cun su Partito dei sardi), de Sinistra Futura impuntzende su tzentru manca.

Si imbetzes faeddamus de giùstitzia, in sa Nuova b’agatamus duas pàgina faeddende de sa riforma Nordio (ministru oe atacadu dae La Stampa e Fatto quotidiano in contu de evasione fiscale) finamentas cun s’intervista a Mario Puddu, sìndigu de Assèmini carchi annu a comu cundennadu pro abusu de ufìtziu e posca assoltu.

In s’Unione imbetzes leghimus de sos giùighes chi faeddant de degòlliu ambientale in Teulada: «Mai cosa gosi in antis de como. dae su 1956 a oe nemos si fiat atrividu de custa manera. Una zona franca mera e sìnchera, sena lege nen controllos, sena règulas. Totu li fiat permìtidu». In intro de s’artìculu s’istòria de su polìgonu e sos chimbe generales imbiados a protzessu.