Sos giornales de oe #024

Lunis de crònaca isportiva in sos giornales sardos cun La Nuova Sardegna chi tinghet a ruju-biaitu una parte de sa prima pàgina sua (pro sa Torres chi, sarvende·si, abarrat in sèrie C) e a rosa un’àtera (cun sa cursa tataresa de sas fèminas contra a sa violèntzia de gènere); e cun L’Unione sarda chi faeddat de sa derrota de su Cagliari in Parma e de sa dispedida de Tonino Orrù, su chi dae sa sèrie C nche torreit sos casteddajos a sos livellos agonìsticos màssimos de su fùbalu italianu pro more de una promotzione dòpia e un’istajone ebbia in sèrie B (1989-90). Ma àteras sunt sas noas de abertura. Dat Tàtari: «Trenos, benidore a duas velotzidades intre nord e sud de s’isula». Dae Casteddu: «Su traballu b’at a èssere, sa gente nono». Movamus dae sa prima: «Sa Regione faeddat de s’eletrificatzione de sa rete ferroviària dae Aristanis in giosso, nudda conca a Tàtari e Terranoa. E sa diferèntzia intre sos duos cabos creschet finamentas in sos caminos ferrados. Cun nemos chi cheret investire pro los mudare». Sa segunda: «Dae oe a su 2027 bi dêt àere logu pro chentumìgia ocupados. Ma at a èssere difìtzile a prenare cussos bòidos ca s’ìnditze de betzesa est prus chi non raddopiadu in binti annos». Mancant sos giòvanos, duncas. Chi a su presente o non traballant o tzucant a aterue. Sos sindacados “faeddant” in ambas noas, in ambos giornales. Sa pregonta de chie est leghende custas noas, resumende·las inoghe, est dòpia: pro ite fàghere manifestatziones territoriales (in prus de no èssere classistas) cando chi su problema de sos trasportos, pròpiu pro no èssere su chi est como, meresset una vertèntzia ùnica? Pro ite non punnare a s’impiegu massissu de sos giòvanos chi lu sunt como, impedende·lis de tzucare a aterue, permitende·lis de su fraigare unu benidore fintzas cun carchi criadura pro chi custas criaduras matessi siant sos giòvanos de cras? O ite semus timende de gherrare che in Frantza pro un’edade giusta de pensionamentu de sos chi sunt traballende como?

m.p.