Sos giornales de oe #021

Bonas dies. E comintzemus dae su chi non b’ant postu in prima pàgina, est a nàrrere s’assolutzione de bator pastores acusados de blocu istradale pro more de sos decretos Salvini e a pustis de una manifestatzione patzìfica in sa 131 dcn in pare cun meda àtera gente. Bator cristianos pigados dae sos medas (in cue, in mesu de caminu, b’aiat finamentas carchi sìndigu) e unu tempus longu de udièntzias e de oriolos petzi pro àere manifestadu pro sa dignidade issoro, de su traballu issoro e finamentas de su late imboladu. E puru in prima pàgina carchi crònaca de tribunale giai bi l’ant posta. Una prescritzione pro impreu de marijuana e 22 ultras cun su daspo. Pro su restu sigamus a bìdere ite b’at.

Torrant sas allegas in contu de insularidade. L’Unione sarda faeddat de sas «cumpensatziones de sos discumbènios insulares» chi «giai sunt una realidade in Còrsica, in sas Baleares e in sas Canàrias, in ue a sos dipendentes pùblicos lis intregant una “indennidade de residèntzia” cunforma a sa funtzione a su ruolu». De ite semus faeddende, de giustìtzia sotziale aplicada a sa territorialidade o de ideas postas a cùrrere pro non chèrrere iscrìere “fine” a sos gap chi non sunt e non podent èssere petzi geogràficos? Pro nàrrere, su de b’àere unu nùmeru bassu de nàschidas, dae s’insularidade dipendet? O s’ispopulamentu, cussu puru ca semus un’ìsula in mesu de su Mediterràneu?

E de ispopulamentu faeddat La Nuova Sardegna ponende a maduru su «Sos de sos Comunes minores»: «Ispopulados e isrobbados». Ma su contu pertocat su Pnrr chi si presentat che a una «trampa»: «dinare virtuale, ca s’antìtzipu de sos traballos pro sos progetos aprovados lu devent pònnere sos Comunes. Dinare chi non tenent». In pràtica una rèplica de cantu aìamus bidu in rassigna su 14 de abrile cun su sìndigu de Martis chi pròpiu custu naraiat. Gasi comente noa no est sa noa de su 51% de abba pèrdida in caminu: fintzas a custa cosa l’aìamus coladu s’evidentziadore su 22 de martzu.

Colemus a sos giornales italianos e sapemus·nos chi finamentas custu giru s’agenda est detada dae Fratelli d’Italia, cun su connadu de Giorgia Meloni, su ministru de sa massaria e de sa sovranidade alimentare chi at àpidu sa brillante idea de faeddare de “sostitutzione ètnica”. Forsis si pensaiat galu faeddende in addòbiu de Coldiretti in contu de petza sintètica chi non devet “sostituire” sa de su Mc Donald chi nânt chi est bona e Made in Italy...

Lassemus pèrdere. A cras.