Sos giornales de oe #016

Si nche colamus dae sas pregadorias a sas cantzones (in ambos giornales bi sunt sos faeddos de su ministru Valditara chi, sena la difèndere a sa moda de Solinas, serrat sa chistione de sa maistra a rughe fata) bi nd’at una intre sas prus lègias de su panorama musicale itàlicu chi faghet «col trattore in tangenziale andiamo a comandare». Oe, non pro cumandare ma pro chi sos chi cumandant ascurtent, unos 70 de tratores a passu de professone ant a animare sa protesta contra a su parcu eòlicu in tretos de Barùmini e Biddanoafranca.

Est cosa chi nos contat L’Unione sarda in prima e in sas pàginas chi sighint dende boghe a sos de Coldiretti, a sos sìndigos de sas duas biddas (e fintzas sos de Iscroca e de Biddanoa de Forru). E semper s’Unione nos dat a ischire de sos Consìgios comunales in setziada comune de Mandas, Gèsigu e Sèligas chi ant deliberadu unu dispositivu de «cuntrastu, resistèntzia e rebellia a custa forma noa de neo-colonizatzione» de su territòriu. E de sos sitos archeològicos. Gasi etotu b’at contu de su nono de su Comune de Telti e de su comitadu de Nuraxi Figus indiritzende·si a sos sìndigos de Gonnesa, Igrèsias, Carbònia, Portescusi, Biddamassàrgia e Santu Giuanni Suèrgiu.

E sa Regione? Narat s’assessore de s’Ambiente Matteo Porru chi «si a Sardigna, chi tenet totu sas caraterìsticas dèghidas pro custos impiantos, ant a pedire unu surplus cunforma a su chi li bisòngiat, b’at diritu a una “recumpensa” prus manna».

Intre sos petzos de prima pàgina de La Nuova Sardegna b’at imbetzes contu de su tzilibirche: «Est invasione ma si gherrat pro limitare sos dannos»: «S’invasione b’at a èssere, in antis de s’ora cunforma a sos annos colados. Sos oos si sunt abertos in martzu e su tzilibirche nch’est giai a su segundu istàdiu prontu a sos bolos suos in maju. Sa regione lìmitat sos dannos ma sa gherra no est parìvile». Una pregadoria a Sant'Efis che a sa chi Solinas fadeit in tempos de Covid?

Àteras noas de importu pertocant sa morte de unu presoneri in galera impuntzadu a si mòrrere in sa Nuova; gasi etotu de lèghere su pàrrere a manu de manca in s’Unione pro su sèberu de sa mama de Enea e su corsivu in bassu in contu de bèstias de acabbare «ca s’atrivint a bìvere in s’habitat issoro» (su riferimentu est a s’orsu chi at mortu a unu curridore).

In sos giornales italianos s’agenda proposta pertocat su fiscu, sos migrantes («Allarme falsu» pro su Manifesto; «Emergèntzia a beru est?» tìtulat Avvenire), sas nòminas guvernativas, sas normas contra a sos ecologistas chi imbrutant logos e monumentos e sas brigas intre Calenda e Renzi.

m.p