Boghes e mùsica de sas fotografias de Giuseppe Tamponi II

Aprofundimentu de su chenàbura - Sighit dae sa prima

2. Dae pagu ais otènnidu unos cantos reconnoschimentos: 5 de chimbe setziones in su Photo Contest - ACI Pistoia. A bi nd’at, intre sas tiradas, de immàgines preferidas?

Bi so torradu dae pagu a pigare parte a sos cuncursos fotogràficos (bìnchidu meda nd’apo in su tempus coladu), otenende finas vitòrias a livellu natzionale (mancari prefèrgia sas mustras). Pro seguru m’agradant sos disafios dificultosos e sos cuncursos sèrios, e duncas non b’ando a sos “cuncurseddos” locales a s’ispissu aprontados dae chie nudda cumprendet de fotografia e, galu peus, giugados dae chie nche l’ant postu in giuria petzi pro more de s’incàrrigu sotziale suo sena cunsiderare sa cumpetèntzia chi bi deghet in campu fotogràficu o artìsticu. Pro custu est chi a bìnchere in sos cuncursos natzionales, cun livellos de calidade prus artos, no est fàtzile. Ma b’at grandu cuntentesa s’in casu b’apat reconnoschimentos. A minudu, in su cuncursu de s’Aci Pistoia no apo primegiadu: apo coladu una prima seletzione cun unu 5/5 e cun bonas isperas pro atzèdere a sa segunda, sa top 300 in antis de sa top 20, ma nudda. Si posca devo seberare una de sas 5 immàgines non tèngio dudas, sèbero sa de s’amigu Luciano cun Pinocchio chi a dolu mannu s’est rèndidu pagas dies a como. Pro custu cuncursu bi cheret carchi cosa de prus, ma bi la sigo. A bìdere istemus annoas.

3. Ite mi diais rispondere si deo naro “fotografia est memòria”?

Chi emmo. Sa memòria est una de sas propiedades de s’immàgine fotogràfica! Si pensamus a s’istòria nostra, a sas acontèssidas tristas, a sas de gosu, a sas de importu chi l’ant caraterizada, ma finamentas a sas fotografias tiradas in ocasiones de anniversàrios, ite est chi nos torrat a fàghere bìvere in prima persone cussas situatziones, cussas atmosferas, cussas sensatziones? Su contu iscritu ebbia non bi diat resèssere gasi a fundu. De su restu, s’istòria antiga, cando galu non b’aiat fotografias, la contaiant cun sas illustratziones. E gasi est chi apo contatdu s’istòria de sa famìlia mea pro mèdiu de sas immàgines recuperende paritzas fotografias betzas (chi mancu male no mi mancaiant) iscansionende·las e aunende·las in unu libru fotogràficu chi costoo bene bene. Apo fatu unu libru fotogràficu de sos primos bator annos de neta mea (dae su die chi nascheit). Apo fatu unu libru de s’Àrdia de Sèdilo cun immàgines tiradas in 23 annos cun testos in italianu, inglesu e sardu. Totus immàgines ligadas a sa memòria sunt.

(sighit)