Sos giornales de oe #010

Bonas dies, ùrtima rassigna de sa chida cun sa mirada a sos giornales sardos e no a su pabiru ebbia. Ca l’ischimus totu cantos semus cantu siat importante sa presèntzia de giornales e de giornalistas in sos social network. Oe, a pustis de sa chi pertocaiat sa chistione Nsa, est un’àtera die cun sa diferèntzia marcada in sos surcos algorìtmicos de sa rete.

Eris amus bidu sa prima pàgina de La Nuova Sardegna a amus iscritu:

Comente at a pòdere bìnchere s’istrategia de Aeroitalia (chi como est frisca de acordu cun sa Regione garantende unu billete de 200 èuros finas pro sos non residentes) in intro de su cuadru nou de gestione aeroprtuale cun sa fusione de S’Alighera e Terranoa e cun sa nàschida de Nord Sardegna Aeroporti? Sa Nuova pro seguru, chi at contadu cuntenta s’operatzione, nos at a tènnere informados dae como in susu.

E difatis, su giornale tataresu oe bi torrat, cun in prima custu tìtulu: «Como iscontos fintzas dae Ita», unu virguletadu chi faghet essire cussa frase dae sa buca de s’assessore regionale de sos Trasportos «chi pedit a sa cumpangia de sighire s’esèmpiu de Aeroitalia».

«So cuntentu mannu – semper s’assessore Moro a pàgina 3 – de s’atentzione mustrada dae Aeroitalia pro sa Sardigna torrende a marcare unu cuntzetu chi tèngio in coro dae s’insediamentu: su trasportu aèreu pro un’ìsula no est petzi una chistione econòmica ma fintzas sotziale e ètica. Su de àere reconnotu a sos emigrados sa tarifa de sos residentes tenet unu valore chi nche bàrigat sa cantificatzione de su costu de su billete».

Ma pro ite amus mentovadu sos social? Ca finamentas a custu giru, gasi comente pro s’afare Nsa (sa fusione intre sas sotziedades de gestione de sos aeroportos de Terranoa e de S’Alighera), sas crìticas non las agatamus incolunnadas in pabiru ma in su profilu de una pinna de primore de L’Unione sarda.

«Non b’at mèdiu – iscriet Mauro Pili –. B’at personàgios chi creent a sos sardos che a gente cun s’aneddu in pinnas de nare. Cussu “patu” ridìculu firmadu dae una cumpangia aèrea e una Regione metzana bantende iscontos pro emigrados sardos e tarifas aèreas “controlladas” e “calmieradas” pro sos “non residentes” est una bufonada pro chie creet chi sa continuidade territoriale siat unu donu o un’iscontu de chie si siat sena cumprèndere chi est unu diritu. Sa continuidade territoriale est sa tarifa ùnica ebbia, che pare pro totu cantos, pro intrare a Sardigna comente pro cale si siat àtera regione a cunditziones parìviles».

Custu cheret nàrrere chi a bortas una rassigna de imprenta cheret fata mirende finas a su chi non b’at iscritu.

Colende a sos italianos: bi nd’at unos cantos chi si interessant de sa trascritzione de sos tzertificados de nàschida de sos pitzinnos nàschidos in foras de Itàlia pro mèdiu de Gpa (in antìtesi Repubblica, «Botzados in contu de diritos», e Avvenire, «Malafaddina europea»); àteros aberint cun sa mèngua de sas bulletas dae abrile (La Stampa, Il sole 24 ore, Il Messaggero); àteros bi la sighint cun sa chistione de sos apaltos (cuntrastu intre Corriere e il Fatto).

m.p.