Sos giornales de oe #004

Chi «sa Regionet frenat» l’amus bidu giai dae eris isfogende sas pàginas de sos giornales sardos. Giornales chi oe bi torrant, ambos, ponende·lu in su tìtulu printzipale. Semus faeddende de sos aeroportos, o mègius, de sas sotziedades de gestione issoro, de s’Alighera e de Terranoa.

In ambos sos giornales bi sunt sos faeddos de s’assessore regionale de sos trasportos Antonio Moro. Chi lu sintetizamus: su motivu de sa frenada regionale est su critèriu de valutatzione de sos iscalos, prus favorèvole pro su de Terranoa, chi diat pàrrere non proportzionale a su tràficu. Bi proat a l’acrarire La Nuova in segunda pàgina: «Sa diferèntzia de sos duos patrimònios movet dae sa presèntzia, in Terranoa, de s’aeroportu privadu a ue bi lompent sos boeing de isceicos e tzelebridades e chi in austu est su prus traficadu de Europa».

Su giornale tataresu est dae eris chi nos presentat cun favore s’operatzione. Cosa chi no at fatu s’Unione sarda lassende però a su cabu redatore suo, Mauro Pili, sa libertade de manifestare contrariedade manna cun unu post in facebook.

E si eris amus faeddadu de Michele Pais non comente presidente de su Cussìgiu regionale ebbia, ma finamentas comente aligheresu, oe su leghista est in cumpangia de duos ex sìndigos de sa tzitade sua. Mauro Tedde cheret chi sa polìtica «vìgilet pro chi s’operatzione non determinet mènguas in s’iscalu de Fertìlia». Mario Bruno annanghet chi «sos obietivos cuantitativos de su tràficu passigeris cherent partzidos cun ecuidade intre sos duos iscalos».

Ma b’at àteru, e l’agatamus in sas pàginas internas de sos duos giornales: sa Regione non nch’at a barigare su 3% de s’atzionariadu (a su presente tenet su 23 de Sogeaal – lompende·nche a su 28 pro mèdiu de sa Sfirs – e su 1,6% de Geasar).

In s’Unione, pàgina 2, b’amus fintzas sa boghe de Alberto Bertolotti, presidente de Confcommercio de su Sud Sardigna, chi timet sa privatizatzione de Sogaer, sa sotziedade chi gestit s’aeroportu de Casteddu a su presente controllada a dae sa Càmera de cummèrtziu de Casteddu-Aristanis pro su 94,4%. «De custa manera – narat – si intregat a unu sugetu privadu totu sa polìtica de sos trasportos aèreos de sa Regione. In medas sunt sos chi non bident sas trampas dae como in susu».

Custa est sa noa a maduru in ambos sos giornales. Ma in s’Unione bi nd’agatamus un’àtera chi pertocat s’Einstein telescope de Lùvula: ca in Europa sa candidatura cuncurrente est apogiada dae su vitze de Ursula Von der Leyen.

In sos giornales italianos sa noa printzipale pertocat sas comunicatziones de eris de Giorgia Meloni in sa Càmera de sos deputados in contu de gherra in Ucraina, cun s’ausèntzia de sos ministros de sa Lega in sos bancos de s’esecutivu.

m.p