Istorbos de s’alimentatzione e de sa nutritzione, frocos lilla su 15 de martzu

Controllos e bìsitas gratùitas pro una temàtica chi diat merèssere un’atentzione prus manna. Sos istorbos de s’alimentatzione e de sa nutritzione (anoressia e bulimia in primis) rapresentant unu problema de salude pùblica chi est interessende semper prus gente, mescamente intre sos prus giòvanos.

«Istùdios internatzionales – leghimus in una nota de s’Asl de Tàtari – ant rilevadu una crèschida de intzidèntzia intre sas fèminas dae sos 12 a sos 25 annos. In otzidente, Itàlia incrùida, contamus 4-8 casos noos de anoressia cada annu e onni 100mìgia indivìduos, 9-12 pro su chi pertocat sa bulimia, presentende·si dae sos 10 a sos 30 annos». Su frochitu lilla est su sìmbulu de custa die chi, istituida dae pagu, ocannu lompet a sa de 12 editziones. E custu at a èssere su colore chi at a caraterizare s’open day aprontadu dae s’Asl tataresa cun controllos e sensibilizatzione dae sas 9 a sas 18.30 in su primu pianu de su Dipartimentu de Salude mentale de carrera de Amendola 55.