Beranu bèllicu in Sardigna cun Joint stars 23 e Noble jump 23

Joint stars 23 e Noble jump 23. Sunt sos nùmenes de sas esertzitatziones militares noas in Sardigna in programma custu beranu in su polìgonu de Teulada e in àteros tretos militarizados de s’ìsula. Sa segunda est un’annestru de sa Nato, e in su situ matessi de s’alleàntzia atlàntica podimus lèghere chi sa cosa serbit «to demonstrate the capability of a timely deployment and integrate Nato Forces as a contribution to Nato's Deterrence and Defence (D2) posture». In pagas paràulas: impreu lestru e coordinadu de sas fortzas armadas atlànticas in crae deterrente e defensiva. S’ammiràlliu de divisione Fabio Agostini, chi giai pigheit parte a operatziones Nato in sa ex Jugoslàvia, at acraridu sas punnas a sos membros de su comitadu paritèticu Comipa chi devet autizare o mancu sos programmas de annestru. Sa Noju23 fiat pranificada dae su 2020, est programmada dae su 26 abrile a su 13 de maju e, nât chi, «at a èssere un’esertzitatzione logìstica pro iscumproare sa capatzidade de movimentu de sas fortzas in intro de su territòriu alleadu». Semper Agostini narat chi «sas esertzitatziones cun fogu» las ant a fàghere «rispetende sas règulas, sos protocollo e sos “standardization agriment” de sa Nato». Belle 3mìgia sos sordados chi ant a lòmpere dae Germània, Grètzia, Letònia, Lussemburgu, Norvègia, Olanda e Repùblica Tzeca.

m.p.