72 cantinas sardas pro sa de 55 editziones de su Vinitaly

Aprofundimentu de su chenàbura - Lompet a sa de 55 editziones su Vinitaly, s'addòbiu prus famadu in contu de binu e de cantinas de primore. Ma pro ite oe semus faeddende de custu argumentu? Sa resposta est sèmplitze: pro ite sunt 72 sas aziendas sardas chi ant a leare parte a custa manifestatzione de importu mannu.

“In Sardigna – at pretzisadu su Presidente de sa Regione Autònoma de Sardigna Christian Solinas – sa bide e su binu sunt presentes dae 5000 annos”. Rapresentant, l'ischimus, unu setore importante de sa produtzione agrìcula de s'ìsula. In prus, sighit su Presidente etotu, su territòriu sardu at una bio-diversidade chi lu caraterizat e chi at caraterizadu totu sa produtzione enològica de Sardigna.

Cun 1700 metros cuadros de superfìtzie, su Vinitaly s'at a isboligare in sos locales de su “Padiglione 8”, in su Veronafiere de Verona, in ue sa R.A.S. at a àere un'area totu pro sei e custa at a serbire pro promotzionare sos binos sardos. In cust'àrea ant a èssere organizados unos cantos addòbios dedicados a sos tastos de sos binos e peri de àteros màndigos tìpicos sardos.

Tocat finas a agiùghere ca ant a èssere sete in totu sos apuntamentos in ue enologia, coghina e traditziones ant a contare sa Sardigna e l'ant a fàghere connòschere a sos bisitadores de sa fiera de Verona.

Gosi, podimus nàrrere ca custa manifestatzione sighit a rapresentare un'ocasione importante pro sas realidades produtoras de binu in Sardigna. Carchi nùmeru podet èssere ùtile pro cumprendere su chi amus afirmadu: su 40% de binu produtu in s'ìsula nostra si bendet foras de sas làcanas de Sardigna; sas aziendas sardas produtoras de binu chi ant un'eticheta sunt 300 e custu est unu nùmeru ispantosu meda; sa Sardigna at 19 ampullas cun marcu DOC e unu DOCG. Segundu su pensu de s'Assessora de S'Agricultura e Reforma agropastorale Valeria Satta, custa est una realidade chi at a pòdere crèschere.