14,5 milliones pro torrare a incaminare sas salinas de Casteddu

Aprofundimentu de su lunis - Est abertu su bandu pro torrare a fàghere bìvere su Parcu Molentàrgius. Unu progetu de 14,5 milliones pro incaminare sas salinas de Casteddu. S'ùrtimu sale de sa salina est istadu collidu in su 2003. Ma sas salinas sunt istadas serradas a beru una bindighina de annos a como.

Ma ite deve cuntènnere su progetu? Su progetu dedicadu a sas Salinas devet ripristinare sos sistemas traditzionales dedicados a sa tzirculatzione de s'abba salida. A pustis, pro torrare a pònnere in motu sa produtzione, serbit sa cuntzetzione minerària. A manera crara sa produtzione non devet fàghere dannu a sos "habitat", duncas devet traballare rispetende sa vegetatzione e sos animales de su parcu, chi oe est una destinatzione naturalìstica e isportiva importante.

Su bandu est istadu annuntziadu in unu cunvegnu de "Legambiente", in ue su diretore Claudio Papoff at acraradu ca "su progetu previdit finas s'autonomia energetica cun unu parcu fotovoltaicu". Comente sutalìneat Papoff etotu sa bulleta de su parcu est immoe de 300milla èuros. S'impiantu nou assegurat s'energia netzessària a sos motores de sos grupos de sas idrovoras de su Poetu, de su "Rollone" e de Palamontis.
No est totu, su progetu previdit interventos massimamente pro torrare a assentare sos àrgines. B'ant a èssere finas s'esproprios in 35 ètaros de parcu.

"Sas crititzidades de sa terra - pretzisat Papoff - interessant finas sos iscàrrigos chi non sunt in retza, sos pàsculos abusivos, sos fogos, s'abbandonu de sos refudos e sa presèntzia de canes lassados lìberos da sos meres. Medas finas sos caddos".

Pro sa torrada in vida de sas Salinas est nàschidu peri unu comitadu de tzitadinos chi pro mèdiu de sa presidente Emanuela Abis declarat "isperamus de bìdere de presse s'acumulatzione de su sale".

Custos disponimentos, comente at declaradu carchi mese a como su presidente de su Parcu - "Ant recaimentos positivos pro sas comunidades locales, sos istudiantes e sos turistas".

In sa zona de Is Arenas in Cuartu sa punna est sa de assentare sos ortos e sos frutorajos. In Casteddu in sa zona de s' "Idrovora del Rollone" sunt provìdidas àreas destinadas a su teatru e a s'acasàgiu de sos bisitadores e de sos turistas.