Naschet su Tzentru Ambientale de sa comuna de Arborea

Aprofundimentu de su lunis - L'ant inchingiadu su 2 de su mese de freàrgiu coladu. Semus faeddende de su Tzentru Ambientale de sa comuna de Arborea, nàschidu in sos aposentos de sa ex Colònia, in sa Marina de Arborea.

S'ocasione est istada importante, pro ite su tzentru at cumentzadu sa vida sua in sa die chi est dedicada a sas zonas ùmidas. Su tzentru, tocat a lu nàrrere, at a acasagiare sos documentos e sos materiales chi pertocant a su patrimòniu ambientale de sa bidda in Provìntzia de Aristanis. Una zona, sa de Arborea, de interessu naturalìsticu e duncas de importu mannu pro sos obietivos de su progetu etotu.

In die de oe su tzentru acasàgiat un'espositzione de importu. Sa mustra, difatis, pertocat a sos traballos de bonìfica fatos in su XX sèculu dae sa "Società Bonifiche Sarde", unu momentu meda importante pro s'istòria de sa comunidade de Arborea. Sunt traballos chi ant interessadu sa zona e massimamente su territòriu de sa bidda, e finas su pinedu chi s'agatat in s'àrea marina.

In prus de custa espositzione sos aposentos de su tzentru acasàgiant peri una mustra dedicada a sas zonas ùmidas chi est istada aprontada dae s'Afni Sardegna.

Su progetu de su tzentru est istadu finantziadu cun 150milla èuros, fundos regionales de sa "Programmazione Territoriale 2014-2020". Su tìtulu de su progetu est «Dal mare verso l'interno: gli itinerari del Terralbese e del Linas». Tocat a sutalineare ca cun custa summa de dinare s'est finas rivalorizada sa turre "antincendio" chi s'agatat in su coro de su pinedu, tra sa 26 e sa 27.

Sa punna de su tzentru est sa de rapresentare unu logu in ue s'ant a pòdere connòschere su territòriu e sas resursas ambientales chi sunt una caraterìstica importante chi lu caraterizat. S'isperu est su de fàghere crèschere custu progetu e su chi custu rapresentat siat pro sa comuna de Arborea siat pro totu su territòriu de sas biddas de sa zona.