Avisu pros sos traballos de rivalorizatzione e seguràntzia de sos fàbbricos iscolàsticos

Aprofundimentu de su chenàbura - Pertocat a su PNRR e massimamente a sa chi in sos documentos ufitziales est numenada  "Missione 4 - Istruzione e Ricerca -- Componente 1". Semus faeddende de unu finantziamentu chi at a interessare a sas istruturas iscolàsticas, est a nàrrere de dinare destinadu a sos traballos chi ant comente punna sa rivalorizatzione e sa seguràntzia de sos fàbbricos iscolàsticos.

Su finantziamentu est de 32.031.340,92 èuros e pro sa Sardigna b'at giai un'avisu pùblicu chi est istadu aprovadu dae s'Unidade de su Progetu Iscol@.

No est totu. Difatis tocat finas a pretzisare ca Sa Regione Autonoma de Sardigna lassat aberta sa possibilidade de annànghere dinare cun fundos regionales, fundos natzionales e peri fundos europeos.

S'ischit giai ca su 30% de sas resursas at a èssere dadu pro sos traballos chi ant a èssere fatos in sos fàbbricos de sas iscolas segundàrias de II gradu de sas Provìntzias e de sa Tzitade Metropolitana de Casteddu. Su 70%, imbetzes, at a èssere destinadu a sas iscolas de sas comunas, de sas Comunidades Montanas e de sas Uniones de sas comunas.

Ma comente si podet leare parte a su bandu? Dae sas 10.00 de mangianu de oe sos entes chi sunt interessados a otènnere su finantziamentu devent presentare sa candidadura issoro intrende in su sistema informativu "ARES 2.0 - Anagrafe Regionale Edilizia Scolastica" (tocat a incracare inoghe: https://anagrafeares.regione.sardegna.it). Bisòngiat sutalineare puru ca pro imbiare sa dimanda b'at tempus finas a su 6 de su mese de freàrgiu chi at a bènnere. Sa dimanda devet èssere imbiada dae su legale rapresentante o dae su delegadu suo chi ant a dèvere firmare sos documentos cun sa firma digitale. A pustis, sa dimanda devet èssere imbiada dae sa PEC a s'indiritzu: iscola@pec.regione.sardegna.it

Po àteras informatziones si podet iscrìere a s'indiritzu email progettoscuola@regione.sardegna.it.