1800 patzientes? Sos mèigos de base non nde cherent s’intesa

Sos mèigos de base non nde cherent s’intesa. A bisu de sos sindacados issoro no est cosa proponìbile sa de sighire 1800 patzientes imbetzes de sos (giai meda) 1500 atuales. S’idea de acrèschere su càrrigu de traballu naschet in sa mesa de s’Assessore regionale nou, Carlo Doria, pro afrontare sa crisi sanitària.

Fimmg e Snami ant a pedidu a s’Assessore de pònnere in parte sos mèigos e sas organizatziones issoro cara a cada disinnu riorganizativu. Pro parte sua Doria at naradu chi giai dae custu merie s’at a addobiare cun sos rapresentantes de Meighina generale sighende però a nàrrere chi sa proposta de s’aumentu temporàneu dae 1500 a 1800 abarrat in campu. «No amus imbentadu nudda de nou – narat Doria –. Est totu prevìdidu in s’acòrdiu natzionale». Fimmg e Snami aiant dadu s’ok a cuota 1800 in Emilia Romagna s’istiu coladu, in pare cun Smi e Cisl Medici. Ma cussa cuota non fiat pro totu cantos: petzi pro sos chi lompent a su de tres annos de cunventzionamentu (sos primos duos semper 1500).

De prus, sa Regione padana aiat postu in sa mesa 13 èuros pro cada patziente assìstidu imbetzes de 7,50. Ma est craru finamentas chi cada paragone intre sa sanidade emiliana e sa sarda no agiudat ripropositziones de mesuras adotadas in aterue.

M.P.